ପୁରୀ (ଏଟିଆର ବ୍ୟୁରୋ): ଶରଧାବାଲିରେ ରଥାରୁଢ ଚତୁର୍ଦ୍ଧା ବିଗ୍ରହ । ଭାଇ ଭଉଣୀଙ୍କୁ ସଙ୍ଗରେ ଘେନି ଗୁଣ୍ଡିଚା ମନ୍ଦିର ସମ୍ମୁଖରେ ପହଁଚି ଯାଇଛନ୍ତି କାଳିଆ ସାଆନ୍ତ । ଆଜି ଅପରାହ୍ନରେ ଆଡପ ମଣ୍ଡପକୁ ବିଜେ କରିବେ ମଣିମା । ଏହାପରେ ବିନା ଭକ୍ତରେ ଜନ୍ମବେଦୀରେ ଦର୍ଶନ ଦେବେ ଶ୍ରୀଜିଉ । କାରଣ ଭକ୍ତ ଓ ଭଗବାନଙ୍କ ମଧ୍ୟରେ ପାଚେରୀ ହୋଇ ଛିଡା ହୋଇଛି ଅଦୃଶ୍ୟ ମହାମାରୀ ।
କରୋନା କଟକଣା ପାଇଁ ଗତକାଲି ବିନା ଭକ୍ତରେ ଶ୍ରୀଜିଉଙ୍କ ବିଶ୍ୱପ୍ରସିଦ୍ଧ ରଥଯାତ୍ରା ଅନୁଷ୍ଠିତ ହୋଇଥିଲା । ସେବାୟତଙ୍କ ଦ୍ୱାରା ଟଣା ଯାଇଥିଲା ତିନି ରଥ । ଶରଧାବାଲିରେ ତିନି ରଥ ପହଁଚିବା ପରେ ଗୀତ ଗୋବିନ୍ଦ ପାଠ ହୋଇଥିଲା । ଏହାପରେ ଆଜି ରଥ ଉପରେ ସମସ୍ତ ନୀତିକାନ୍ତି ସମ୍ପନ୍ନ ହେବା ପରେ ଆଡପ ମଣ୍ଡପକୁ ବିଜେ କରିବେ ଚତୁର୍ଦ୍ଧା ମୂରତୀ ।
