ଭୁବନେଶ୍ୱର (ଏଟିଆର ବ୍ୟୁରୋ); ଚଳିତ ନିର୍ବାଚନରେ ମଇଦାନକୁ ଓହ୍ଲାଇଥିବା ସିନେ ତାରକାଙ୍କ ମଧ୍ୟରେ ହିରୋଙ୍କ ବିଜୟ ହୋଇଥିବା ବେଳେ ହିରୋଇନ ହାରିଯାଇଛନ୍ତି । ହିରୋ ବିଜେଡିରୁ ନିର୍ବାଚନ ଲଢ଼ିଥିବା ବେଳେ ହିରୋଇନମାନେ ବିଜେପିରୁ ମଇଦାନକୁ ଓହ୍ଲାଇଥିଲେ । ତେବେ ରାଜ୍ୟରେ ନବୀନଙ୍କ ଲହରୀ ସେମାନଙ୍କୁ ମହଙ୍ଗା ପଡିଛି । ଆମେ କାହା କଥା କହୁଛି ଆପଣମାନେ ଭଲସେ ଜାଣିସାରିବେଣି । ହିରୋ ହେଉଛନ୍ତି ଅନୁଭବ ମହାନ୍ତି ଏବଂ ହିରୋଇନ ହେଉଛନ୍ତି ପିଙ୍କି ପ୍ରଧାନ,ଅପରାଜିତା ମହାନ୍ତି ।
ଅନୁଭବ ମହାନ୍ତି- ରାଜ୍ୟ ରାଜନୀତିର ବହୁଚର୍ଚ୍ଚିତ କେନ୍ଦ୍ରାପଡା ଲୋକସଭା ଆସନରେ ବିଜେପିର ବରିଷ୍ଠ ନେତା ବୈଜୟନ୍ତ ପଣ୍ଡାଙ୍କ ସହିତ ପ୍ରତିଦ୍ୱନ୍ଦିତା କରିଥିଲେ । ଅନୁଭବ ମହାନ୍ତି ଏଠାରେ ବୈଜୟନ୍ତ ପଣ୍ଡାଙ୍କୁ ଅମାନତ ହରାଇ ରେକର୍ଡ କରିଛନ୍ତି । ଅନୁଭବ ପୂର୍ବରୁ ରାଜ୍ୟସଭା ସାଂସଦ ହୋଇଛନ୍ତିି କିନ୍ତୁ ପ୍ରଥମଥର ଲାଗି ନିର୍ବାଚନ ଲଢ଼ିଥିଲେ ।
ପିଙ୍କି ପ୍ରଧାନ-ଗଞ୍ଜାମ ଜିଲ୍ଲାର ଦିଗପହଣ୍ଡି ଆସନରେ ମନ୍ତ୍ରୀ ସୂର୍ଯ୍ୟ ନାରାୟଣ ପାତ୍ରଙ୍କ ସହ ନିର୍ବାଚନ ଲଢ଼ିବା ପାଇଁ ବାହାରିଥିଲେ ପିଙ୍କି । ସେ ବିଜେପି ମହିଳା ମୋର୍ଚ୍ଚାର ଉପସଭାପତି ହୋଇଥିଲେ ସୁଦ୍ଧା ଏଠାରେ ପରାଜୟ ବରଣ କରିଛନ୍ତି । ଏହା ତାଙ୍କର ପ୍ରଥମ ନିର୍ବାଚନ ଥିଲା ।
ଅପରାଜିତା ମହାନ୍ତି- ଭୁବନେଶ୍ୱର ମଧ୍ୟମରୁ ନିର୍ବାଚନ ମଣ୍ଡଳୀରୁ ବିଜେପି ଟିକେଟରେ ଲଢ଼ିଥିଲେ । କିନ୍ତୁ ସେ ଏଠାରେ ପରାଜୟ ହୋଇଛନ୍ତି । ୨୦୧୪ ନିର୍ବାଚନରେ ସେ କଂଗ୍ରେସରୁ କଟକ ଲୋକସଭା ଆସନରେ ଲଢ଼ି ପରାଜୟ ହୋଇଥିଲେ । କିନ୍ତୁ ଚଳିତ ନିର୍ବାଚନରେ ସେ ବିଜେପିରେ ଯୋଗ ଦେଇ ଟିକେଟ ହାତେଇଥିଲେ ।
