ନୂଆଦିଲ୍ଲୀ (ଏଟିଆର ବ୍ୟୁରୋ ) ; ଆଜି ଭାରତୀୟ କ୍ରିକେଟ ଦଳର ଅଧିନାୟକ ବିରାଟ କୋହଲିଙ୍କ ଜନ୍ମଦିନ । ଆଜି ୩୦ ବର୍ଷରେ ପାଦ ଥାପିଛନ୍ତି ବିରାଟ । କୋଟି କୋଟି କ୍ରିକେଟ ପ୍ରଶଂସକଙ୍କ ମନରେ ରାଜ କରୁଥିବା କୋହଲି ନିଜ ସାଙ୍ଗ , ପରିବାର ତଥା ଧର୍ମପତ୍ନୀଙ୍କ ସହ ବିଭିନ୍ନ ସ୍ଥାନରେ ପାଳିଛନ୍ତି ନିଜ ଜନ୍ମଦିନ ।
୧୯୮୮ ମସିହା ନଭେମ୍ବର ୫ ତାରିଖରେ ବିରାଟ କୋହଲି ଦିଲ୍ଲୀରେ ଜନ୍ମଗ୍ରହଣ କରିଥିଲେ । ୨୦୧୮ ବର୍ଷ ତାଙ୍କ ପାଇଁ ବେଶ ଶୁଭଙ୍କର ହୋଇଛି । ଏହି ବର୍ଷ ସେ ବହୁ ଜାତୀୟ ତଥା ଆର୍ନ୍ତଜାତୀୟ ବିରଳ ରେକର୍ଡ ସ୍ଥାପନ କରିପାରିଛନ୍ତି । ବିରାଟ ନିଜ ଜନ୍ମଦିନକୁ ପ୍ରତିବର୍ଷ ଭିନ୍ନ ଭିନ୍ନ ଅନ୍ଦାଜରେ ପାଳନ କରିଥାଆନ୍ତି । ଏ ବର୍ଷ ପ୍ରଥମେ ନିଜ ପରିବାର ସହ ଜନ୍ମଦିନ ପାଳନ କରିଛନ୍ତି ବିରାଟ । ପରେ ସେ ନିଜ ସାଥୀ ଖେଳାଳି ତଥା ଭାରତୀୟ କ୍ରିକେଟ ଦଳ ସହ ଜନ୍ମଦିନ ପାଳନ କରିଛନ୍ତି ।
ତେବେ ଲୋକପ୍ରିୟ ଅଭିନେତ୍ରୀ ଅନୁଷ୍କା ଶର୍ମାଙ୍କ ସହ କିଛି ଭିନ୍ନ ଅନ୍ଦାଜରେ ନିଜ ଜନ୍ମଦିନ ପାଳନ କରିବାକୁ ମନସ୍ତ କରିଛନ୍ତି ବିରାଟ । ଚଳିତ ବର୍ଷ ସେ ଅନୁସ୍କାଙ୍କ ସହ ଡେରାଡୁନ ଓ ହରିଦ୍ୱାର ଭ୍ରମଣରେ ଯାଇଛନ୍ତି । ଏହି ୭ ଦିନିଆ ଭ୍ରମଣ ପ୍ଲାନ ପାଇଁ ବିରାଟ ଓ ଅନୁସ୍କା ଗତ ଶନିବାର ଦିନ ଡେରାଡୁନରେ ପହଞ୍ଚିଛନ୍ତି । ଅନ୍ୟପଟେ ବିରାଟଙ୍କ ଜନ୍ମଦିନ ଅବସରରେ ପାଳନ ହୋଇଥିବା ଉତ୍ସବକୁ ଖୋଦ ବିରାଟ ସୋସିଆଲ ମିଡିଆରେ ସେୟାର କରିଛନ୍ତି । ଚଳିତ ଇଣ୍ଡିଜ ବିପକ୍ଷ ଟି-୨୦ ମ୍ୟାଚରୁ ବିରାଟଙ୍କୁ ବାଦ ଦିଆଯାଇଛି ।
ସେ କିଛିଦିନ ନିଜ ପରିବାର ଗହଣରେ ସମୟ ବିତାଉଛନ୍ତି । କୋଟି କୋଟି ପ୍ରଶଂସକ ବିରାଟର ଜନ୍ମଦିନ ଅବସରରେ ତାଙ୍କୁ ଅଭିନନ୍ଦନ ଦେଇଛନ୍ତି । ସୋସିଆଲ ମିଡିଆ ମାଧ୍ୟମରେ ବିରାଟଙ୍କୁ ଶୁଭେଚ୍ଛା ଜଣାଇଛନ୍ତି ତାଙ୍କର ଢେର ସାରା ପ୍ରଶଂସକ । ଖାଲି ସେତିକି ନୁହେଁ ବିରାଟଙ୍କୁ ଅନେକ ସେଲିବ୍ରିଟି ତଥା ରାଜନେତା ମଧ୍ୟ ଜନ୍ମଦିନର ଶୁଭେଚ୍ଛା ଜଣାଇଛନ୍ତି ।
