ନୂଆଦିଲ୍ଲୀ (ଏଟିଆର ବ୍ୟୁରୋ): ଜାତୀୟ କ୍ରୀଡା ଦିବସ ଅବସରରେ ଭାରତ ପାଇଁ ଉପହାର ଆଣିଛନ୍ତି ଭାରତୀୟ ଯୁବା ମହିଳା ସୁଟର ଇଲାବେନିଲ ଭାଲାରିବାନ୍ । ରିଓ ଡି ଜନେରିଓ ରେ ଚାଲୁଥିବା ସୁଟିଂ ବିଶ୍ୱ କପ୍ ୨୦୧୯ ରେ ଇଲାବେନିଲ ସ୍ୱର୍ଣ୍ଣପଦକ ହାସଲ କରିଛନ୍ତି । ୨୦ ବର୍ଷିୟ ଇଲାବେନିଲ ସିନିୟର ସୁଟିଂ ବିଶ୍ୱ କପ୍ ରେ ସ୍ୱର୍ଣ୍ଣ ଜିତିଥିବା ତୃତୀୟ ଭାରତୀୟ ସୁଟର ।
ଏହା ପୂର୍ବରୁ ଅପୂର୍ବା ଚନ୍ଦେଲା ଏବଂ ଅଞ୍ଜଳି ଭାଗବତ ଭାରତ ପାଇଁ ପଦକ ହାସଲ କରିଥିଲେ । ମାତ୍ର ଏବେ ୨୫୧.୭ ଅଙ୍କ ସହିତ ଇଲାବେନିଲ ସ୍ୱର୍ଣ୍ଣ ପଦକ ନିଜ ନାଁରେ କରିଛନ୍ତି । ସେପଟେ ବ୍ରିଟେନର ସିୟୋନାଡ ମ୍ୟାକିଂଟୋଶ ୨୫୦.୦୬ ଅଙ୍କ ସହିତ ରଜତ ହାସଲ କରିଛନ୍ତି ।
ରିପୋର୍ଟ ମୁତାବକ, ଏହାପୂର୍ବରୁ ଜୁନିୟର ୱାଲ୍ଡ କପରେ ଦୁଇଟି ସ୍ୱର୍ଣ୍ଣ ପଦକ ହାସଲ କରିଥିଲେ ଇଲାବେନିଲ । ୨୦୨୦ ଅଲମ୍ପିକ୍ ପାଇଁ ଭାରତ ତାର କୋଟାର ଦୁଇଟି ସ୍ଥାନ ସୁରକ୍ଷିତ କରି ନେଇଛି । ସିନିୟୟର ସୁଟର ଅଞ୍ଜୁମ ମୁଦଗିଲଙ୍କୁ ହରାଇ ବିଜୟୀ ହୋଇଥିଲେ ଇଲାବେନିଲ । ଇଲାବେନିଲ ଏବଂ ଅଞ୍ଜୁମ ଦୁହେଁ ୬୨୯.୦୪ ଏବଂ ୬୨୭.୦୭ ପଏଣ୍ଟ କରି ଫାଇନାଲ ପାଇଁ କ୍ୱାଲିଫାଇ କରିଥିଲେ ।
