ନୂଆଦିଲ୍ଲୀ (ଏଟିଆର ବ୍ୟୁରୋ); ଆସନ୍ତା ମେ ୩୦ରୁ ଆରମ୍ଭ ହେବାକୁ ଯାଉଛି କ୍ରିକେଟ ମହାକୁମ୍ଭ ବିଶ୍ୱକପ । ତେବେ ସବୁ ଦଳ ଚଳିତ ମାସ ୨୩ ସୁଦ୍ଧା ୧୫ ଜଣିଆ ଟିମ ଘୋଷଣା କରିବା ପାଇଁ ଆଇସିସି କହିଛି । ତେବେ ଭାରତୀୟ କ୍ରିକେଟ ଦଳ ଆସନ୍ତା ୧୫ ତାରିଖରେ ଘୋଷଣା କରିବ ବୋଲି ଶୁଣିବାକୁ ମିଳୁଛି । ସୋମବାର ସିଓଏ ବୈଠକ ବସିଥିଲା । ଏହି ବୈଠକରେ ନିଷ୍ପତି ନିଆଯାଇଛି କି ଏମଏସକେ ପ୍ରସାଦଙ୍କ ଅଧ୍ୟକ୍ଷତାରେ ଥିବା ଚୟନ କମିଟି ବିଶ୍ୱକପ ପାଇଁ ୧୫ ଜଣିଆ ଦଳ ଚୟନ କରିବ ।
ଚଳିତ ବିଶ୍ୱକପ ହାତେଇବା ପାଇଁ ଭାରତର ନାମ ସବୁଠାରୁ ଆଗରେ ରହିଛି । ଏଣୁ ଦଳରେ କାହାକୁ ସ୍ଥାନ ମିଳିବ ତାଉପରେ ସମସ୍ତଙ୍କ ନଜର । ଦଳରେ ବହୁ ଯୁବ ଖେଳାଳି ପ୍ରବେଶ କରିବା ସହିତ ଭଲ ଫର୍ମରେ ରହିଥିବାରୁ କାହାକୁ ଚୟନ କରାଯିବ ଏବଂ କିଏ କଟିବ ତାକୁ ନେଇ ଚିନ୍ତାରେ ବିସିସିଆଇ ଚୟନ କମିଟି । ଏବେ ଭାରତରେ ଧନୀ କ୍ରିକେଟ ଲିଗ ଆଇପିଏଲ ଚାଲିଛି । ଏଣୁ ନିୟମିତ ଭାରତୀୟ ଦଳରେ ଖେଳୁଥିବା ଖେଳାଳିଙ୍କ ଫର୍ମକୁ ଦେଖି ସହଜରେ ଚୟନ କରିହେବ ବୋଲି ଚର୍ଚ୍ଚା ହେଉଛି । ତେବେ ପୂର୍ବରୁ ମଧ୍ୟ ଭାରତୀୟ ଦଳର ବହୁ ଅଭିଜ୍ଞ ଖେଳାଳିମାନେ ନିଜର ୧୫ ଜଣିଆ ଟିମ ବାଛିଛନ୍ତି । କିନ୍ତୁ କାହା ପସନ୍ଦର ଖେଳାଳି ଦଳରେ ସ୍ଥାନ ପାଉଛନ୍ତି ତାଉପରେ ସମସ୍ତଙ୍କ ନଜର ।
