ବାଲେଶ୍ୱର (ଏଟିଆର ବ୍ୟୁରୋ) ; ଅକାଳରେ ଚାଲିଗଲା ଜୀବନ । ବାଲେଶ୍ୱର ଜିଲ୍ଲା ବସ୍ତା ଥାନା ଅନ୍ତର୍ଗତ ୬୦ ନମ୍ବର ଜାତୀୟ ରାଜପଥ ହଳଦୀପଦା ବାଇପାସରେ ଦେଖିବାକୁ ମିଳିଛି ଏଭଳି ଏକ ଅଭାବନୀୟ ଘଟଣା । ମିଳିଥିବା ସୂଚନା ମୁତାବକ ସ୍କର୍ପିଓକୁ ଟ୍ରକ ଧକ୍କାଦେବା ଫଳରେ ଘଟଣାସ୍ଥଳରେ ଜଣଙ୍କର ମୃତ୍ୟୁ ଘଟିବା ସହ ୭ ଜଣ ଆହତ ହୋଇଛନ୍ତି । ମୃତକ ଜଣକ ହେଲେ ନୀରବ ଭୋଇ । ଆହତ ବାଲେଶ୍ୱର ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଥିଲା । ତେବେ ଏମାନଙ୍କ ମଧ୍ୟରୁ ଗୁରୁତର ଆହତ ହୋଇଥିବା ୪ଜଣଙ୍କୁ କଟକ ବଡ ମେଡିକାଲକୁ ସ୍ଥାନାନ୍ତରିତ କରାଯାଇଛି । ଏବେ ଗୁରୁତର ଅବସ୍ଥାରେ ଜୀବନ ସହ ସଂଗ୍ରାମ କରୁଛନ୍ତି ଏହି ୪ ଜଣ ।
ସମସ୍ତ ମୃତାହତ ରାୟପୁର ଅଞ୍ଚଳର ବୋଲି ସୂଚନା ମିଳିଛି । ଛତିଶଗଡର ରାୟପୁରରେ ରହୁଥିବା ଜଣେ ସମ୍ପର୍କୀୟଙ୍କ ଦେହ ଖରାପଥିବାରୁ ଏହି ପରିବାରର ୬ଜଣ ସଦସ୍ୟ ଏବଂ ୨ଜଣ ଡ୍ରାଇଭରଙ୍କ ଘରୋଇ ସହାୟିକା ଏକ ସ୍କର୍ପିଓରେ ସେଠାକୁ ଯାଇଥିଲେ । ସମ୍ପର୍କୀୟଙ୍କୁ ଦେଖା କରିବା ପରେ ଶ୍ରୀକ୍ଷେତ୍ର ପୁରୀରେ ଦର୍ଶନ ସାରି କୋଲକାତା ଫେରୁଥିବା ବେଳେ ହଳଦୀପଦା ବାଇପାସ ପାଖରେ ସ୍କର୍ପିଓକୁ ଧକ୍କା ଦେଇଥିଲା ଟ୍ରକ । ଘଟଣାସ୍ଥଳରେ ନୀରବଙ୍କ ମୃତ୍ୟୁ ହୋଇଥିବା ବେଳେ ୪ଜଣ ଗୁରୁତର ଆହତ ହୋଇଥିବା ବେଳେ ୩ଜଣଙ୍କର ସାମାନ୍ୟ କ୍ଷତ ହୋଇଥିଲା । ସ୍ଥାନୀୟ ଲୋକ ଏମାନଙ୍କୁ ଉଦ୍ଧାର କରି ମେଡିକାଲ ପହଁଞ୍ଚାଇଥିବା ବେଳେ ପୋଲିସ ଆସି ମୃତ ଦେହକୁ ଉଦ୍ଧାର କରିଥିଲେ ।
