ନୂଆଦିଲ୍ଲୀ (ଏଟିଆର ବ୍ୟୁରୋ): ଅଲମ୍ପିକ କ୍ୱାଲିଫାୟର୍ସର ପ୍ରସ୍ତୁତି ପାଇଁ ଅଲମ୍ପିକ ଟେଷ୍ଟ ଇଭେଣ୍ଟରେ ଭାଗନେବା ଲାଗି ଜାପାନ ଯାଇଥିବା ଭାରତୀୟ ପୁରୁଷ ହକି ଟିମ୍ ଟୁର୍ଣ୍ଣାମେଣ୍ଟ ଆରମ୍ଭରୁ ବିଜୟ ହାସଲ କରିବା ସହ ମାଲେସିୟାକୁ ୬-୦ ରେ ହରାଇଛି । ସେହିପରି ପୁରୁଷ ଟିମ୍ ପୂର୍ବରୁ ମହିଳା ହକି ଟିମ୍ ମଧ୍ୟ ମ୍ୟାଚ ର ଆରମ୍ଭରୁ ବିଜୟୀ ହୋଇ ଜାପାନକୁ ୨-୧ ରେ ମାତ୍ ଦେଇଥିଲା ।
ଭାରତୀୟ ଟିମ୍ ପାଇଁ ୧୦୦ତମ ମ୍ୟାଚ୍ ଖେଳୁଥିବା ଗୁରସାହିବଜିତ୍ ସିଂହ ୧୮ ଏବଂ ୫୬ ମିନିଟ୍ ରେ ଦୁଇଟି ଗୋଲ କରିଥିଲେ । ତାଙ୍କ ବ୍ୟତିତ ମନଦୀପ ସିଂହ ୩୪ ଏବଂ ୪୭ ମିନିଟ୍ ରେ ଦୁଇଟି ଗୋଲ କରିଥିଲେ । ସେହିପରି ବରୁଣ କୁମାର ଏବଂ ଏସବି ସୁନୀଲ ଗୋଟେ ଗୋଟେ ଗୋଲ କରିଥିଲେ ।
ବିଶ୍ୱ ର୍ୟାଙ୍କିଂରେ ପାଞ୍ଚ ନମ୍ବରରେ ଥିବା ଭାରତୀୟ ଦକୁ ମ୍ୟାଚ୍ ପାଇଁ ଦିଆଯାଇଥିବା ସମୟ ଭିତରେ ବରୁଣ ଏବଂ ଗୁରସାହିବଜିତଙ୍କ ଗୋଟେ ଗୋଟେ ଗୋଲରେ ଅଧା ସମୟ ମଧ୍ୟରେ ୨-୦ କରିନେଇଥିଲେ । ଏହାପରେ ଅନ୍ୟ ଅଧା ସମୟରେ ଭାରତ ତାର ସାନ୍ଦାର ପ୍ରଦର୍ଶନ ଜାରି ରଖିଥିଲା ଏବଂ ମାଲେସିୟା ଦଳକୁ ମାତ୍ ଦେଇଥିଲା ।
