ମୁମ୍ବାଇ(ଏଟିଆର ବ୍ୟୁରୋ): କରୋନା ଭାଇରସ ବେଳେ ଲକ ଡାଉନ୍ ଓ ସଟ ଡାଉନ୍ ଚାଲିଥିବା ବେଳେ ବଲିଉଡ ଅଭିନେତା ସୋନୁ ସୁଦ ସାଜିଥିଲେ ଅଭାବୀଙ୍କ ଦେବଦୂତ । ସେ ଏବେ ମଧ୍ୟ ଅନେକ ଲୋକଙ୍କୁ ସାହାଯ୍ୟ କରୁଛନ୍ତି ।
ସେ ସୋସିଆଲ୍ ମିଡିଆକୁ ନିଜ ଅସ୍ତ୍ର କରି ଲଗାତାର ଭାବେ ଲୋକଙ୍କୁ ସାହାଯ୍ୟ କରୁଛନ୍ତି। କାହାକୁ ଘର ଯୋଗାଇ ଦିଆଯାଉଛି ତ କାହାର ପାଠପଢ଼ାର ଖର୍ଚ୍ଚ ବହନ କରାଯାଉଛି। ସାହାଯ୍ୟ ଯେଉଁ ଧରଣର ହୋଇଥାଉନା କାହିଁକି ସୋନୁ ନିଜ ଅଭିଯାନ ଜରିଆରେ ସମସ୍ତଙ୍କ ଜୀବନରେ ଖୁସି ନେଇ ଆସୁଛନ୍ତି। ଏବେ ତାଙ୍କର ଏହି ଅନ୍ଦାଜ ଦେଖି ତାଙ୍କର ଜଣେ ପ୍ରଶଂସକ ବଡ଼ ଦାବି କରିଛନ୍ତି । ସୋସିଆଲ ମିଡିଆରେ ସୋନୁ ସୁଦଙ୍କ କାମରେ ଖୁସି ହୋଇ ଜଣେ ପ୍ରଶଂସକ ତାଙ୍କ ପାଇଁ ଭାରତର ସର୍ବୋଚ୍ଚ ସମ୍ମାନ ଭାରତ ରତ୍ନର ଦାବି କରିଛନ୍ତି। ୟୁଜର ଏକ ପୋଷ୍ଟ ଜରିଆରେ ସରକାରଙ୍କୁ ଗୁହାରି କରି ଲେଖିଛନ୍ତି ଯେ ଆଦରଣୀୟ ପ୍ରଧାନମନ୍ତ୍ରୀ ମହାଶୟ,ଆମ ସମସ୍ତ ଦେଶବାସୀଙ୍କ ଦାବି ରହିଛି ଯେ ଯେଉଁଭଳି ଭାବେ କରୋନା ମହାମାରୀରେ ସୋନୁ ସୁଦ ଗରିବ,ଶ୍ରମିକ ଓ ଛାତ୍ରମାନଙ୍କୁ ସହାୟତା କରିଛନ୍ତି ଏବଂ କରୁଛନ୍ତି,ତାଙ୍କ ଭଳି ପ୍ରକୃତ ହୀରୋଙ୍କ ପାଇଁ ଭାରତ ରତ୍ନ ପୁରସ୍କାର ଦେବାକୁ ଦାବି କରୁଛୁ! ସୋନୁଙ୍କ ପାଇଁ ଭାରତ ରତ୍ନ ପ୍ରଥମ ଥର ଦାବି କରାଯାଇନାହିଁ। ଲକଡାଉନ୍ ସମୟରେ ମଧ୍ୟ ତାଙ୍କ କାମରେ ଖୁସି ହୋଇ ଏପରି ଦାବି କରାଯାଇଥିଲା। ସୋନୁ ସୁଦ ସବୁଥର ଭଳି ଏଥର ମଧ୍ୟ କିଛି ନକହି ଏକ ଇମୋଜି ଜରିଆରେ ତାଙ୍କ ମନ୍ତବ୍ୟ ରଖିଛନ୍ତି । ସେ ପ୍ରଶଂସକଙ୍କ ପ୍ରେମକୁ ସମ୍ମାନ ଜଣାଇ ଏକ ହାତ ଯୋଡ଼ୁଥିବା ଇମୋଜୀ ପଠାଇଛନ୍ତି।ସବୁ ବେଳେ ଡାଉନ ଟୁ ଆର୍ଥ ରହି ସମସ୍ତଙ୍କ ସେବା କରିବାକୁ ଚାହୁଁଛନ୍ତି ।
