ନୂଆଦିଲ୍ଲୀ(ଏଟିଆର ବ୍ୟୁରୋ): ଦୁଇଟି ଜାତୀୟ ଗଣମାଧ୍ୟମ ବିରୋଧରେ କୋର୍ଟରେ ମାମଲା ରୁଜୁ କରାଯାଇଛି । ବଲିଉଡ ଚଳଚ୍ଚିତ୍ର ଜଗତର ଛବି ଖରାପ କରିଥିବାରୁ ୩୮ଟି ଫିଲ୍ମ ପ୍ରଡକ୍ସନ ହାଉସ ଓ କମ୍ପାନୀ ପକ୍ଷରୁ ଦିଲ୍ଲୀ ହାଇକୋର୍ଟରେ ରିପବ୍ଲିକ ଟିଭି, ଟାଇମ୍ସ ନାଓ ଗଣମାଧ୍ୟମ ବିରୋଧରେ ମାମଲା ଦାଏର କରାଯାଇଛି । ସେହିପରି ୪ଜଣ ସାମ୍ବାଦିକଙ୍କ ବିରୋଧରେ ମଧ୍ୟ କୋର୍ଟରେ ଆବେଦନ କରାଯାଇଛି । ଏହି ଆବେଦନରେ ଦର୍ଶାଯାଇଛି ଯେ ଗତ କିଛି ମାସ ଧରି ବଲିଉଡ ଇଣ୍ଡଷ୍ଟ୍ରି ବିପକ୍ଷରେ ଏହି ଗଣ ମାଧ୍ୟମ ଅନେକ ଅପବ୍ୟବହାର ଜନିତ ଶବ୍ଦ ବ୍ୟବହାର କରିଥିବା ଓ ବଲିଉଡର ଛବି ମଳୀନ କରାଯାଉଥିବା କୁହାଯାଇଛି । ଏହାସହ ଅପମାନଜନକ ଓ ବଦନାମ କରିବା ପାଇଁ ଷଡଯନ୍ତ୍ର ରଚୁଥିବା କିଛି ଟିଭି ଚ୍ୟାନେଲ୍ ଓ ସାମ୍ବାଦିକଙ୍କକୁ ରୋକିବା ପାଇଁ ଅପିଲ କରାଯାଇଛି । ଏହି ଆବେଦନ ଦାଖଲ କରିଥିବା ପ୍ରଡକ୍ସନ ହାଉସ୍ ମଧ୍ୟରେ ଶାହରୁଖ ଖାନ, ସଲମାନ ଖାନ, ଅମିର ଖାନ, ଅଜୟ ଦେବଗନଙ୍କ ହାଉସ୍ ରହିଛି ।
ଗତ ୪ ମାସରେ ଅନେକ ଗଣମାଧ୍ୟମ ରିପୋର୍ଟରେ ବଲିଉଡକୁ ନେଇ ଅନେକ କିଛି କୁହାଯାଉଛି । ବଲିଉଡ୍ ଡ୍ରଗ୍ସ ଲିଙ୍କରେ ଅନେକ ସେଲିବ୍ରିଟିଙ୍କୁ ଏଥିରେ ଯୋଡାଯାଇଛି । ଦିଲ୍ଲୀ ହାଇକୋର୍ଟରେ ଯେଉଁ ଆବେଦନ ହୋଇଛି ସେଥିରେ ରିପବ୍ଲିକ୍ ଟିଭି ଓ ଟାଇମ୍ସ ନାଓର ନାଁ ରହିଛି । ଏହାସହ ଅର୍ଣ୍ଣବ ଗୋସ୍ୱାମୀ, ପ୍ରଦୀପ ଭଣ୍ଡାରୀ, ରାହୁଲ ଶିବଶଙ୍କର ଓ ନାବିକା କୁମାରଙ୍କ ନାଁ ମଧ୍ୟ ରହିଛି । ଏହା ସହ ନ୍ୟୁଜ୍ ଚ୍ୟାନେଲକୁ କିଛି କଣ୍ଟେଣ୍ଟ୍ ହଟାଇବାକୁ ମଧ୍ୟ ଦାବି କରାଯାଇଛି ।
ଅଭିଯୋଗ ହୋଇଛି ଯେ, ଏହି ଚ୍ୟାନେଲ ଗୁଡିକରେ ବଲିଉଡକୁ ନେଇ ଅନେକ ଅପଶବ୍ଦ ପ୍ରୟୋଗ କରାଯାଇଛି ।ଏହାପରେ ୩୪ଟି ବଡ ପ୍ରଡକ୍ସନ ହାଉସ ଓ ୪ଟି ପ୍ରଡକ୍ସନ ସଂସ୍ଥା ଏକାଠି ହୋଇ ଏହି ଚ୍ୟାନେଲ ବିରୁଦ୍ଧରେ ସ୍ୱର ଉତ୍ତୋଳନ ମଧ୍ୟ କରିଛନ୍ତି । ଫିଲ୍ମ ନିର୍ମାତା ବିବେକ ଅଗ୍ନୀହୋତ୍ରୀ ଏହି ସମସ୍ତ ପ୍ରଡକ୍ସନ ହାଉସର ତାଲିକା ପ୍ରକାଶ କରିଛନ୍ତି । ଏହି ତାଲିକାରେ, ଅମିର ଖାନ ପ୍ରଡକ୍ସନ ହାଉସ, ଶାହରୁଖ ଖାନଙ୍କ କମ୍ପାନୀ ରେଡ୍ ଚିଲିଜ୍, ସଲମାନ ଖାନ ଫିଲ୍ମସ, ଧର୍ମା ପ୍ରଡକ୍ସନ. ଆଡ୍ ଲ୍ୟାବ୍ସ ଫିଲ୍ମ, ଅଜୟ ଦେବଗନ ଫିଲ୍ମ, ଅନିଲ କପୁର ଫିଲ୍ମ ଆଣ୍ଡ କମ୍ୟୁନିକେସନ, ଅରବାଜ ଖାନ ପ୍ରଡକ୍ସନ, ଫରହାନ ଅଖତାରଙ୍କ ଏକ୍ସେଲ୍ ଏଣ୍ଟରଟେନମେଣ୍ଟ୍ ରହିଛି । ତେଣୁ ଏହି ସବୁ ନ୍ୟୁଜ ପ୍ରଡକ୍ସନ ହାଉସ ସେହି ଗଣ ମାଧ୍ୟମ ଓ ସାମ୍ବାଦିକଙ୍କ ବିରୋଧରେ ଯଥା ଶିଘ୍ର କାର୍ଯ୍ୟାନିଷ୍ଠାନ ନେବା ପାଇଁ କହିଛନ୍ତି ।
