କେନ୍ଦ୍ରାପଡା,(ଏଟିଆର ବ୍ୟୁରୋ): ଖାଇପିଇ ଶୋଇଥିଲେ । ହେଲେ ଆଉ ଉଠିଲେ ନାହିଁ । ଯମଦୂତ ସାଜିଲା ହାଇୱା । ଏକ ଦୋକାନ ଉପରେ ହାଇୱା ଗାଡି ମାଡିଯିବାରୁ ଘଟଣାସ୍ଥଳରେ ଦୋକନୀଙ୍କ ସମେତ ଗାଡି ଡ୍ରାଇଭରଙ୍କ ମୃତ୍ୟୁ ହୋଇଛି ।
ଆଜି ସକାଳେ ଏମିତି ଘଟଣା ଘଟିଛି ମର୍ଶାଘାଇ କ୍ରସିଂ ଛକ ନିକଟରେ । ଜାତୀୟ ରାଜପଥ କଡ଼ରେ ଏକ ଦୋକାନ କରି ପରିବାର ଚଳାନ୍ତି ବାଳକୃଷ୍ଣ ଜେନା । ଗତକାଲି କାମ ସାରି ଦୋକାନ ଭିତରେ ସେ ଶୋଇଥିଲେ । ତେବେ ଭୋର ସମୟରେ ଅଚାନକ ଏକ ହାଇୱା ତାଙ୍କ ଦୋକାନ ଉପରକୁ ମାଡ଼ି ଯାଇଥିଲା । ଫଳରେ ବାଳକୃଷ୍ଣଙ୍କ ସମେତ ହାଇୱା ଡ୍ରାଇଭରଙ୍କ ମୃତ୍ୟୁ ହୋଇଛି । ପୁଲିସ ମୃତଦେହକୁ ଜବତ କରି ବ୍ୟବଚ୍ଛେଦ ଲାଗି ପଠାଇଥିବା ବେଳେ ଦୁର୍ଘଟଣା ଘଟାଇଥିବା ହାଇୱାକୁ ଜବତ କରିଛି ।
