ଭୁବନେଶ୍ୱର (ଏଟିଆର ବ୍ୟୁରୋ): ବଲିଉଡ ଅଭିନେତ୍ରୀରୁ ଜଣେ ଇଣ୍ଟରନ୍ୟାସନାଲ ଆଇକନର ପରିଚୟ ପାଇଥିବା ଅଭିନେତ୍ରୀ ହେଉଛନ୍ତି ପ୍ରିୟଙ୍କା ଚୋପ୍ରା । ଆଜିକାଲି ପ୍ରିୟଙ୍କା ଆମେରିକାର ସିଙ୍ଗର ନିକ୍ ଜୋନସ୍ଙ୍କ ସହିତ କଥିତ ସଂପର୍କକୁ ନେଇ ଖୁବ୍ ଚର୍ଚ୍ଚାରେ ଅଛନ୍ତି । ଏହି ସବୁ ମଧ୍ୟରେ ପ୍ରିୟଙ୍କା ନିର୍ଦ୍ଦେଶକ ଶୋଲାନି ବୋସଙ୍କ ଆଗାମୀ ଫିଲ୍ମରେ କାମ କରିବେ ବୋଲି ଶୁଣିବାକୁ ମିଳୁଛି । ଏଥିରେ ପ୍ରୟଙ୍କାଙ୍କ ବିପକ୍ଷରେ ଫରହାନ ଆକତର ନଜର ଆସିବେ । ଏହି ଫିଲ୍ମରେ ହିରୋ ଚରିତ୍ରରେ ଅଭିଶେଖ ବଚ୍ଚନଙ୍କୁ ନେବେ ବୋଲି ନିର୍ଦ୍ଦେଶକ ନିଷ୍ପତି ନେଇଥିଲେ । କିନ୍ତୁ ଅଭିଶେଖ ବଚ୍ଚନ ଏହି ଫିଲ୍ମ ପାଇଁ ରାଜି ନହେବାରୁ ଫରହାନ ଆକତରଙ୍କୁ ଦେଖିବାକୁ ପାଇବେ ଦର୍ଶକ ।
ପ୍ରିୟଙ୍କା ଏବଂ ଫରହାନ୍ ଦୁହେଁ ଏହି ଫିଲ୍ମରେ ମାତା-ପିତା ଭୂମିକାରେ ନଜର ଆସିବେ । ମିଳିଥିବା ରିପୋର୍ଟ ଅନୁଯାୟୀ, ଫିଲ୍ମର କାହାଣୀଟି ଦିଲ୍ଲୀର ଆୟାଶା ଚୌଧୁରୀଙ୍କ ଜୀବନ ଉପରେ ଆଧାରିତ । ଯିଏ ୧୮ ବର୍ଷ ବୟସରେ ଗମ୍ଭୀର ରୋଗ ଯୋଗୁଁ ଦୁନିଆ ଛାଡି ଚାଲିଯାଇଥିଲେ । ୬ ମାସରୁ ଗମ୍ଭୀର ରୋଗ ସହ ସଂଘର୍ଷ କରୁଥିବା ଆୟାଶା ଜଣେ ମୋଟିଭେସନାଲ ସ୍ପିକର ଥିଲେ । ଏହି ଫିଲ୍ମରେ ପ୍ରିୟଙ୍କା ଏବଂ ଫରହାନ ଦୁହେଁ ଆୟାଶାଙ୍କ ମାତା-ପିତା ଭୂମିକାରେ ଅଭିନୟ କରୁଥିବାର ନଜର ଆସିବେ । ଏବଂ ଆୟାଶା ଭୂମିକାରେ ଜାୟରା ୱାସିମ୍ ଙ୍କୁ ଦେଖିବାକୁ ପାଇବେ ଦର୍ଶକ ।
