ଭଦ୍ରକ,(ଏଟିଆର ବ୍ୟୁରୋ): ଯିଏ ଯେମିତି ପାରିଲେ ଭାଙ୍ଗିଲେ । କିଏ ପଥରେ ଛେଚି ଦେଲା ତ’ ଆଉ କିଏ ଶୂନଫୁଟକା ପରି ରାସ୍ତାରେ ପିଙ୍ଗିଲା । ପରିସ୍ଥିତି ଏପରି ହେଲା ଯେ ରାସ୍ତାରେ ମଦର ସୁଅ ଲହଡି ମାରିଲା । ଏକ ଚୋରା ମଦ ଗାଡି ଦୁର୍ଘଟଣା ଘଟାଇବା ପରେ ଏଭଳି ଘଟଣା ଦେଖିବାକୁ ମିଳିଛି ଭଦ୍ରକ ଜିଲ୍ଲା ଧାମନଗର ଅଞ୍ଚଳରେ । ତେବେ କିଏ ଓ କେଉଁଠୁ ଏତେ ପରିମାଣର ଚୋରା ମଦ ନେଇ ଯାଉଥିଲା ତାହା ଏଯାବତ ଜଣାପଡିନାହିଁ ।
ପୁଲିସ ଗାଡିକୁ ଜବତ କରି ଘଟଣାର ଖୋଳତାଡ ଆରମ୍ଭ କରିଛି । ରିପୋର୍ଟ ଅନୁସାରେ, ଏକ ବୋଲେରୋ ଗାଡିରେ ଚୋରା ମଦ ଆସୁଥିବା ଖବର ପାଇ ପୁଲିସ ଗାଡିଟିର ପିଛା କରିଥିଲା । ହେଲେ ଦୃତଗତିରେ ମାଡିଯାଉଥିବା ବୋଲେରୋ ଗାଡିର ଚକା ହଠାତ କରଣପଲ୍ଲୀ ଛକ ନିକଟରେ ଫାଟିଯାଇଥିଲା । ଭାରସାମ୍ୟ ହରାଇ ବୋଲେରୋଟି ଏକ ବାଇକକୁ ଧକ୍କା ଦେଇଥିଲା । ଏହାପରେ ସ୍ଥାନୀୟ ଲୋକେ ଗାଡିକୁ ଅଟକାଇଥିଲେ । ଉତ୍ତେଜନା ପରିସ୍ଥିତି ସୃଷ୍ଟି ହୋଇଥିଲା । ତେବେ ଗାଡି ଭିତରେ ବହୁ ପରିମାଣର ମଦ ଦେଖିବା ପରେ ଆହୁରି ତାତି ଯାଇଥିଲେ ଲୋକେ । ଏକଜୁଟ ହୋଇ ଗାଡିକୁ ଭଙ୍ଗାରୁଜା କରିବା ମଦ ବୋତଲକୁ ରାସ୍ତାରେ ଫିଙ୍ଗିଥିଲେ । ପରେ ପୁଲିସ ପହଞ୍ଚି ଗାଡିକୁ ଜବତ କରିଛି ।
