ନୟାଗଡ (ଏଟିଆର ବ୍ୟୁରୋ); ବରଯାତ୍ରୀ ଯାଇଥିଲେ । ନାଚ କଲେ ଆଉ ଖୁସିରେ ଘରକୁ ଫେରୁଥିଲେ । କିନ୍ତୁ ଅଧାବାଟରେ ଗୋଟିଏ ଗାଡି ଦୁର୍ଘଟଣା ହୋଇଥିବାରୁ ପଛକୁ ପଛ ଆଉ ଦୁଇଟି ଗାଡି କୁଟି ହୋଇଯାଇଥିଲା । ନୟାଗଡ ଜିଲ୍ଲା ଦଶପଲ୍ଲା ଅନ୍ତର୍ଗତ କାଳିଆପଡା ନିକଟରେ ଘଟିଛି ଏହି ମର୍ମନ୍ତୁଦ ସଡକ ଦୁର୍ଘଟଣା । ଏହି ଦୁର୍ଘଟଣାରେ ୧୦ ଜଣ ଆହତ ହୋଇଛନ୍ତି । ଏମାନଙ୍କ ମଧ୍ୟରୁ ୬ଜଣଙ୍କ ଅବସ୍ଥା ସଙ୍କଟାପର୍ଣ୍ଣ ରହିଛି । ଗୁରୁତରମାନଙ୍କୁ ନୟାଗଡ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି ।
ସୂଚନା ଅନୁଯାୟୀ, ରବିବାର ଦଶପଲ୍ଲାରୁ କଣ୍ଟିଲୋ ଏକ ବରଯାତ୍ରୀ ଶୋଭାଯାତ୍ରାରେ ଯାଇଥିଲେ । ଖୁସିରେ ଖୁସିରେ ନାଚି ନାଚି ଝିଅ ଘରେ ପହଁଞ୍ଚିଥିଲେ ବରଯାତ୍ରୀ । ସେଠାରେ ଭୋଜି ଭାତ ଖାଇ ପୁଣିଥରେ ରାତିରେ ଘରକୁ ଫେରୁଥିଲେ । ତେବେ କାଳିଆପଡା ନିକଟରେ ଆଗରେ ଆସୁଥିବା ଏକ ଗାଡି ଭାରସାମ୍ୟ ହରାଇ ଦୁର୍ଘଟଣାର ଶିକାର ହୋଇଥିଲା । ଏହାପରେ ତା ପଛକୁ ପଛ ଗୋଟିଏ ଗୋଟିଏ ତିନୋଟି ଗାଡି ଧକ୍କା ଦେଇଥିଲେ ।
ଦୁର୍ଘଟଣାର ଶିକାର ହୋଇଥିଲା ୩ଟି ଗାଡି । ଯଦିଓ ଏଥିରେ ୨୫ ଜଣ ପାଖାପାଖି ବସିଥିଲେ କିନ୍ତୁ ୧୦ ଜଣ ଆହତ ହୋଇଛନ୍ତି । ଆହତଙ୍କ ମଧ୍ୟରେ ମହିଳା ମଧ୍ୟ ଅଛନ୍ତି । ପ୍ରଥମେ ସ୍ଥାନୀୟ ଲୋକ ଆହତଙ୍କୁ ଉଦ୍ଧାର କରିଥିଲେ । ଏବଂ ତାଙ୍କୁ ଦଶପଲ୍ଲା ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି କରିଥିଲେ । ପରେ ୬ଜଣଙ୍କ ଅବସ୍ଥା ସଙ୍କଟାପର୍ଣ୍ଣ ହେବାରୁ ଆହତଙ୍କୁ ନୟାଗଡ ଜିଲ୍ଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତରିତ କରାଯାଇଥିଲା ।
