ଭଞ୍ଜନଗର,(ଏଟିଆର ବ୍ୟୁରୋ): ଗୋଟିଏ କି’ ଦୁଇ ବଖରା ନୁହେଁ ପୂରାପୂରି ୫୦ବଖରା ଘର ପୋଡି ପାଉଁସ ହୋଇଯାଇଛି । ସର୍ବଶ୍ୱ ହରାଇଛନ୍ତି ପାଖାପାଖି ୯ଟି ପରିବାର । ଏଭଳି ଏକ ଭୟାନକ ଅଗ୍ନିକାଣ୍ଡ ଘଟିଛି ବ୍ରାହ୍ମଣପଦର ପଞ୍ଚାୟତ ଘରଡପଲ୍ଲୀ ଗାଁରେ । ଖବର ପାଇ ଅଗ୍ନିଶମ ବିଭାଗ ପହଞ୍ଚି ଯଦିଓ ନିଆଁକୁ ଆୟତ୍ତ କରିଛି ହେଲେ ଆଉ କିଛି ବାକି ନାହିଁ । ସବୁକିଛି ନିଆଁରେ ଛାରଖାର ହୋଇଯାଇଛି । ନିଆଁ ଲାଗିବାର କାରଣ ବି ଅସ୍ପଷ୍ଟ ।
କୁହାଯାଉଛି ବିଳମ୍ବିତ ରାତିରେ ଅଚାନକ ନିଆଁ ଲାଗିଯାଇଥିଲା । ଚାହୁଁ ଚାହୁଁ ପୂରା ଗାଁଟା ଜଳି ଉଠିଥିଲା । ଯେତେ ଚେଷ୍ଟା କଲେ ବି ଲୋକେ ନିଆଁକୁ ଆୟତ୍ତ କରି ପାରିନଥିଲେ । ଆଉ ଲୋକଙ୍କ ଆଖି ଆଗରେ ସବୁ କିଛି ସ୍ୱାହା ହୋଇଯାଇଥିଲା । ସେ ଧାନ ଚାଉଳ କଥା ହେଉ କି’ ପିଲାଙ୍କ ଭବିଷତ୍ୟର ସାର୍ଟିଫିକେଟ । ସବୁ କିଛି ପାଉଁସ ହୋଇଯାଇଛି । ନିଆଁର ପ୍ରକୋପ ଏତେ ଜୋର ଥିଲା ଯେ, ନିମିଷକ ମାତ୍ରେ ପୂରା ଗାଁଟା ହୁତୁହୁତୁ ହୋଇ ଜଳିବାକୁ ଲାଗିଥିଲା । ୩ଟି ଦମକଳ ଗାଡି ନିଆଁକୁ ଲିଭାଇବାକୁ ଚେଷ୍ଟା କରିଥିଲେ । ସେପଟେ ଶୀତଦିନେ ଏଭଳି ଅଘଟଣ ବିପନ୍ନଙ୍କୁ ଚିନ୍ତାରେ ପକାଇଛି । ତୁରନ୍ତ ବିପନ୍ନଙ୍କୁ ସହାୟତା ଦେବାକୁ ଦାବି ହୋଇଥିବା ବେଳେ ପୂରା ଘଟଣାକୁ ବୁଲି ଦେଖିଛି ଜିଲ୍ଲା ପ୍ରଶଶସନ ।
