ଭୁବନେଶ୍ୱର,(ଏଟିଆର ବ୍ୟୁରୋ): ପୁଣି ଏସି ପାଇଁ ଅଗ୍ନିକାଣ୍ଡ । ଜଳିଗଲା ସୋରୁମ । ନୂଆବର୍ଷ ଆରମ୍ଭରୁ ଏହି ପ୍ରଥମ ଅଗ୍ନିକାଣ୍ଡ ଘଟିଛି ଭୁବନେଶ୍ୱର ଚନ୍ଦ୍ରଶେଖରପୁର ଡିଷ୍ଟ୍ରିଟ ସେଣ୍ଟରରେ ଥିବା ଏକ ସୋରୁମରେ । ଏସି କଂପ୍ରେସର ଫାଟିବା ଯୋଗୁଁ ଏଭଳି ଅଘଟଣ ଘଟିଥିବା କୁହାଯାଉଛି ।
ଏହି ଅଘଟଣରେ ବହୁ ଗୁରୁତ୍ୱପୂର୍ଣ୍ଣ କାଗଜପତ୍ର ପୋଡି ଯାଇଥିବା ବେଳେ ପ୍ରକୃତ କ୍ଷୟକ୍ଷତି ସମ୍ପର୍କରେ ସୂଚନା ମିଳିନାହିଁ । ସେପଟେ ନିଆଁକୁ ଆୟତ କରିବା ଲାଗି ଅଗ୍ନିଶମ ବିଭାଗର କର୍ମଚାରୀମାନେ ଉଦ୍ୟମ ଜାରି ରଖିଛନ୍ତି । ରିପୋର୍ଟ ଅନୁସାରେ, ଡିଷ୍ଟ୍ରିଟ ସେଣ୍ଟରରେ ଥିବା ଏକ ବାଇକ ସର୍ଭିସ ସେଣ୍ଟରର ଉପର ମହଲାରେ ଲାଗିଥିବା ଏସିରୁ ଅଚାନକ ଧୂଆଁ ବାହାରିଥିଲା । ଚାହୁଁ ଚାହୁଁ ତାହା ହୁତୁହୁତୁ ହୋଇ ଜଳିବାକୁ ଲାଗିଥିଲା । ଅଚାନକ ନିଆଁ ଦେଖି କର୍ମଚାରୀମାନେ ଭୟଭିତ ହୋଇ ଧାଇଁବାକୁ ଲାଗିଥିଲେ । ପରେ ଏନେଇ ଚନ୍ଦ୍ରଶେଖରପୁର ଅଗ୍ନିଶମ ବିଭାଗକୁ ଖବର ଦିଆଯାଇଥିଲା ।
