ପୁରୀ (ଏଟିଆର ବ୍ୟୁରୋ): ସବୁ କିଛି ଜଳି ପୋଡି ପାଉଁଶ । ଚାହୁଁ ଚାହୁଁ ହୁତୁ ହୁତୁ ହୋଇ ଜଳି ଗଲା । ଏଭଳି ଏକ ଭୟାବହ ଅଗ୍ନିକାଣ୍ଡ ପୁରୀ ଜିଲ୍ଲା ବ୍ରହ୍ମଗିରି ଥାନା ଚଣ୍ଡପଡା ଗାଁରେ ଘଟିଛି ।
ଗତକାଲି ବିଳମ୍ବିତ ରାତିରେ ଚଣ୍ଡପଡା ଗାଁରେ ରହୁଥିବା ଜଣେ ବ୍ୟକ୍ତିଙ୍କ ଘରେ ଅଚାନକ୍ ନିଆଁ ଲାଗି ଯାଇଥିଲା । ନିଆଁ ଲାଗିବାର କିଛି କ୍ଷଣି ମଧ୍ୟରେ ଚାରିଆଡକୁ ବ୍ୟାପି ଯାଇଥିଲା । ଯାହାଦ୍ୱାରା ନିଆଁ ଆଁରେ ରହିଥିଲା ପାଞ୍ଚଟି ପରିବାରର ଘର । ନିଆଁର ପ୍ରଭାବ ଅଧିକ ଥିବା ଦେଖି ଲୋକେ ଜୀବନ ବିକଳରେ ଘରୁ ବାହାରକୁ ପଳାଇ ଆସିଥିଲେ । ଏହାପରେ ଅଗ୍ନିଶମ ବିଭାଗକୁ ଫୋନ୍ କରିଥିଲେ । ମାତ୍ର ଅଗ୍ନିଶମ ବିଭାଗ ଟିମ୍ ଘଟଣାସ୍ଥଳରେ ପହଁଚିବା ପୂର୍ବରୁ ପାଞ୍ଚଟି ପରିବାରର ୧୦ ବଖରା ଘର ଜଳି ପୋଡି ପାଉଁଶ ହୋଇଯାଇଥିଲା । ଏହି ଘଟଣାରେ ଲକ୍ଷାଧିକ ଟଙ୍କାର ଜିନିଷ ଜଳି ପୋଡି ଭସ୍ମ ହୋଇଥିବାର କୁହାଯାଉଛି । ମାତ୍ର ସବୁଠାରୁ ବଡ କଥା ହେଉଛି ଅଚାନକ୍ ନିଆଁ କେମିତି ଲାଗିଲା ଏନେଇ କୌଣସି ସୂଚନା ମିଳି ପାରି ନାହିଁ ।
