ମୟୁରଭଞ୍ଜ,(ଏଟିଆରବ୍ୟୁରୋ): ସ୍କୁଲରୁ ଫେରୁଥିବା ବେଳେ ଦୁର୍ଘଟଣାରେ ଜଣେ ଛାତ୍ର୍ରୀଙ୍କ ମୃତ୍ୟୁ ହୋଇଛି । ଘଟଣାରେ ଆହୁରି ୨ଜଣ ମଧ୍ୟ ଗୁରୁତର ଆହତ ହୋଇଥିବା ବେଳେ ସେମାନଙ୍କୁ ଚିକିତ୍ସା ଲାଗି ହସପିଟାଲରେ ଭର୍ତ୍ତି କରାଯାଇଛି । ଘଟଣା ପରେ ସ୍ଥାନୀୟ ଅଞ୍ଚଳରେ ତୀବ୍ର ଉତ୍ତେଜନା ଦେଖାଦେଇଥିଲା । ଲୋକେ ଡ୍ରମ୍ଫର ଡ୍ରାଇଭରକୁ ନିର୍ଦ୍ଧୁମ ପିଟିବା ସହ ଲୁହାପଥର ଖଣି କାର୍ଯ୍ୟାଳୟରେ ପଶି ବ୍ୟାପକ ଭଙ୍ଗାରୁଜା କରିଥିବା ଜଣାପଡିଛି । ୫୦ଲକ୍ଷ ଟଙ୍କା କ୍ଷତିପୁରଣ ଦାବି କରି ଲୋକେ ହଙ୍ଗାମା କରିଥିଲେ । ସବୁଠୁ ବଡ଼ କଥା ହେଉଛି ଲୋକଙ୍କ ଆକ୍ରୋଶର ଶିକାର ହୋଇ ଏବେ ଡ୍ରମ୍ଫର ଡ୍ରାଇଭର ଫଗୁ ହାଂସଦା ଲହୁଲୁହାଣ ହୋଇଛି । ତାଙ୍କୁ ମଧ୍ୟ ହସପିଟାଲରେ ଭତ୍ତି କରାଯାଇଛି । ସେପଟେ ପୁଲିସ ପହଞ୍ଚି ଉତ୍ତ୍ୟକ୍ତ ଲୋକଙ୍କୁ ବୁଝାସୁଝା କରିବା ପରେ ପରିସ୍ଥିତି ଏବେ ଶାନ୍ତ ପଡିଛି । ଦୁର୍ଘଟଣାରେ ଆଖି ବୁଜିଥିବା ଛାତ୍ରୀ ଜଣଙ୍କ ହେଉଛନ୍ତି ମୟୁରଭଞ୍ଜ ଜିଲ୍ଲା ଧାଙ୍ଗଡିମୋତା ଗାଁର ଆରତୀ ଭଦ୍ରା(୬) । ରିପୋର୍ଟ ଅନୁସାରେ, ଛେଡେଗା ଭଦ୍ରା ନାମକ ବ୍ୟକ୍ତି ନିଜ ବାଇକରେ ଆରତୀ ଓ ଅନ୍ୟ ୨ଜଣ ପିଲାଙ୍କୁ ଧରି ନିକଟରେ ଥିବା ସରସ୍ୱତୀ ଶିଶୁ ବିଦ୍ୟାମନ୍ଦିରରୁ ଘରକୁ ଫେରୁଥିଲେ । ହେଲେ ବାଟରେ ଡମ୍ଫରଟି ପଛପଟୁ ଧକ୍କା ଦେଇଥିଲା । ଘଟଣାସ୍ଥଳରେ ଆରତୀଙ୍କ ମୃତ୍ୟୁ ହୋଇଥିବା ବେଳେ ୨ଜଣ ଗୁରୁତର ଆହତ ହୋଇଥିଲେ ।
