ଭୁବନେଶ୍ୱର (ଏଟିଆର ବ୍ୟୁରୋ): ଆଜି ପରଦାରେ ୩ଟି ନୂଆ ଥ୍ରିଲର ଫିଲ୍ମ ରିଲିଜ ହୋଇଛି । ୨୦୦୮ ମସିହାରେ ହୋଇଥିବା ମୁମ୍ବାଇ ତାଜ ମହଲ ପ୍ୟାଲେସ ହୋଟେଲରେ ହୋଇଥିବା ଛାତିଥରା ଆତଙ୍କବାଦୀ ଆକ୍ରମଣ ଘଟଣାକୁ ନେଇ ଆଜି ରିଲିଜ ହୋଉଛି ହୋଟେଲ ମୁମ୍ବାଇ । ଏହି ଫିଲ୍ମକୁ ନିର୍ଦ୍ଦେଶନା ଦେଇଛନ୍ତି ଆନ୍ଥୋନି ମାରସ । ଅଷ୍ଟ୍ରେଲିଆ-ଆମେରିକା-ଭାରତ ମିଳିତ ପ୍ରଯୋଜନା ସଂସ୍ଥା ପକ୍ଷରୁ ଏହି ଫିଲ୍ମଟି ନିର୍ମିତ କରାଯାଇଛି ।ଏହି ଫିଲ୍ମଟି ଇଂରାଜୀ, ହିନ୍ଦୀ, ତାମିଲ ଓ ତେଲୁଗୁ ଭାଷାରେ ଆଜି ମୁକ୍ତିଲାଭ କରିଛି । ତେବେ ଏହି ଫିଲ୍ମଟି ଆଗରୁ ଅଷ୍ଟ୍ରେଲିଆ ଓ ଆମେରିକାରେ ମୁକ୍ତିଲାଭ କରିସାରିଛି । ଏହା ସହ ଟରୋଣ୍ଟୋ ଆନ୍ତର୍ଜାତୀୟ ଚଳଚ୍ଚିତ୍ର ଉତ୍ସବ ଓ ଆଡିଲେଡ ଚଳଚ୍ଚିତ୍ର ଉତ୍ସବରେ ପ୍ରଦର୍ଶିତ ହୋଇ ସାରିଛି । ଏଥିରେ ମୁଖ୍ୟ ଭୁମିକାରେ ଦେବ ପଟେଲ, ଆର୍ମି ହାମର, ନାଜାନିନ ବୋନିଆଦି,ଅନୁପମ ଖେର, କପିଲ କୁମାର, ସୁହେଲ ନାୟାର ପ୍ରମୁଖ ଅଭିନୟ କରିଛନ୍ତି ।
ଅନ୍ୟପଟେ ବିଦ୍ୟୁତ ଜମୱାଲଙ୍କ ଅଭିନୀତ ଆକ୍ସନ ଫିଲ୍ମ କମାଣ୍ଡୋର ପ୍ରଥମ ଓ ଦ୍ୱିତୀୟ ଭାଗ ହିଟ ହେବା ପରେ ଆଜି ରିଲିଜ ହେଉଛି କମାଣ୍ଡୋ-୩ । କମାଣ୍ଡୋର ଦୁଇଟି ଭାଗର ସଫଳତା ପରେ ପ୍ରଯୋଜକ ବିପୁଲ ଅମୃତଲାଲ ଶାହା ଏହାର ତୃତୀୟ ଭାଗ ତିଆରି କରିଛନ୍ତି । ଏଥିରେ ବିଦ୍ୟୁତ ଜାୱାଲ କମାଣ୍ଡୋ କରନବୀର ସିଂହ ଡୋଗ୍ରାଙ୍କ ଭୂମିକାରେ ଦେଖିବାକୁ ମିଳିବ । ବିଦ୍ୟୁତଙ୍କ ମକେତ ଆଦା ଶର୍ମା, ଗୁଲସନ ଦେବୟା, ଅଙ୍ଗିରା ଧର, ଭିକି କାଦିଆନ ପ୍ରମୁଖ ଅଭିନୟ କରିଛନ୍ତି । ସେହିପରି ରୋମାଣ୍ଟିକ ଥ୍ରିଲର ୟେ ଶାଲି ଆଶିକୀ ମଧ୍ୟ ଆଜି ପରଦାରେ ରିଲିଜ ହୋଇଛି । ଏହି ଫିଲ୍ମଟିକୁ ଚିରାଗ ରୂପାରେଲ ନିର୍ଦ୍ଦେଶନା ଦେଇଥିବା ବେଳେ ଏଥିରେ ମୁଖ୍ୟ ଭୂମିକାରେ ଅଭିନୟ କରିଛନ୍ତି ବର୍ଧନ ପୁରୀ ଓ ଶିବାଲିକା ଓବରଏ । ତେବେ ଦେଖିବାକୁ ବାକି ରହିଲା କେଉଁ ଫିଲ୍ମଟି ଦର୍ଶକ ମାନଙ୍କର ମନ ଜିଣି ପାରୁଛି ।
