ମୁମ୍ବାଇ (ଏଟିଆର ବ୍ୟୁରୋ): ବଲିଉଡ ଅଭିନେତା ଆୟୁଷ୍ମାନ ଖୁରାନା ଏଭଳି ଜଣେ ଅଭିନେତା ଯାହାଙ୍କ ଅଭିନୟକୁ ଦର୍ଶକ ଖୁବ୍ ପସନ୍ଦ କରିଥାନ୍ତି । କାରଣ ସେ ତାଙ୍କ ଫିଲ୍ମରେ କିଛି ନା କିଛି ନୂଆ ଦେଖାଇବାକୁ ଚେଷ୍ଟା କରିଥାନ୍ତି । ଏହାସହିତ ଗତ ବର୍ଷ ‘ଅନ୍ଧାଧୁନ୍’ ଏବଂ ‘ବଧାଇ ହୋ’ ଭଳି ଦୁଇଟି ସୁପର ହିଟ୍ ଫିଲ୍ମରେ ନଜର ଆସିଥିଲେ ଆୟୁଷ୍ମାନ । ଏହି ଫିଲ୍ମରେ ଆୟୁଷ୍ମାନଙ୍କ ଅଭିନୟକୁ ଦର୍ଶକ ଖୁବ୍ ପସନ୍ଦ କରିଥିଲେ । ଏବେ ପୁଣି ଆଉ ଏକ ଫିଲ୍ମରେ ଆୟୁଷ୍ମାନଙ୍କର ଅଭିନୟର ଯାଦୁ ଦେଖିବାକୁ ପାଇବେ ଦର୍ଶକ । ଫିଲ୍ମର ଟାଇଟଲ ରହିଛି ‘ଡ୍ରିମ ଗର୍ଲ’ । ସବୁଠୁ ଖାସ୍ କଥା ହେଉଛି ଏହି ଫିଲ୍ମରେ ସୀତା ଭୂମିକାରେ ନଜର ଆସିବେ ଆୟୁଷ୍ମାନ ।
ଆଜ୍ଞା ହଁ, ନିକଟରେ ଏହି ଫିଲ୍ମର ଚରିତ୍ର ବିଷୟରେ ଆୟୁଷ୍ମାନ ସମସ୍ତଙ୍କୁ ଜଣାଇଥିଲେ । ଏହାସହିତ ସେ କହିଥିଲେ କି ଏଥିର ସେ କିଛି ନୂଆ ରୂପରେ ନଜର ଆସିବେ । ଯାହାଫଳରେ ଦର୍ଶକଙ୍କୁ କିଛି ନୂଆ ଦେଖିବାକୁ ମିଳିବ ।
ଆୟୁଷ୍ମାନ ଏକ ଇଣ୍ଟରଭ୍ୟୁରେ କହିଥିଲେ କି, ସେ ତାଙ୍କ ଅପକମିଂ ଫିଲ୍ମ ‘ଡ୍ରିମ ଗର୍ଲ’ରେ ଜଣେ ମହିଳା ଭୂମିକାରେ ନଜର ଆସିବେ । ଯିଏ ରାମଲୀଳାରେ ସୀତା ହୋଇଛନ୍ତି ।
କମେଡି, ଡ୍ରାମାରେ ଭରପୁର ହୋଇ ରହିଛି ଏହି ଫିଲ୍ମ ‘ଡ୍ରିମ୍ ଗର୍ଲ’ । ଏହି ଫିଲ୍ମରେ ଆୟୁଷ୍ମାନ ଖୁରାନା ଏବଂ ନୁସରତ ଭରୁଚା ମୁଖ୍ୟ ଭୂମିକାରେ ନଜର ଆସିବେ । ରାଜ୍ ସଣ୍ଡିଲ୍ୟଙ୍କ ଦ୍ୱାରା ନିର୍ଦ୍ଦେଶିତ ଏହି ଫିଲ୍ମଟିକୁ ପ୍ରଯୋଜନା କରିଛନ୍ତି ଏକତା କପୁର ଏବଂ ଶୋଭା କପୁର ।
