ନୂଆଦିଲ୍ଲୀ (ଏଟିଆର ବ୍ୟୁରୋ): ବଲିଉଡ ଅଭିନେତ୍ରୀ ଶିଳ୍ପା ଶେଟ୍ଟୀ ଏବଂ ତାଙ୍କ ସ୍ୱାମୀ ରାଜ କୁନ୍ଦ୍ରାଙ୍କ ସମସ୍ୟା ଥମିବାର ନାଁ ଧରୁନି କ୍ରମାଗତ ଭାବେ ବଢିବାରେ ଲାଗିଛି। ଏହି ଦମ୍ପତିଙ୍କ ବିରୋଧରେ ଏବେ ଆଉ ଏକ ମାମଲା ରୁଜୁ ହୋଇଛି। ବାସ୍ତବରେ ମୁମ୍ବାଇର ବାନ୍ଦ୍ରା ପୋଲିସ ଷ୍ଟେସନରେ ଶିଳ୍ପା ଶେଟ୍ଟୀ ଏବଂ ରାଜ କୁନ୍ଦ୍ରାଙ୍କ ବିରୋଧରେ ଠକେଇ ମାମଲା ରୁଜୁ ହୋଇଛି। ସୂଚନାନୁସାରେ, ନିତିନ ବାରାଇ ନାମକ ଜଣେ ବ୍ୟକ୍ତି ବାନ୍ଦ୍ରା ପୋଲିସକୁ କହିଛନ୍ତି ଯେ ଶିଳ୍ପା ଏବଂ ରାଜ ତାଙ୍କ ସହ ୨୦୧୪ ମସିହାରୁ ଏକ ଫାର୍ମ ମାଧ୍ୟମରେ ପ୍ରତାରଣା କରୁଛନ୍ତି।
ବାରାଇଙ୍କ ଅଭିଯୋଗ ପରେ ବାନ୍ଦ୍ରା ପୋଲିସ ଭାରତୀୟ ଦଣ୍ଡବିଧି ଆଇନର ବିଭିନ୍ନ ବିଭାଗ ଅନୁଯାୟୀ ଶିଳ୍ପା ଶେଟ୍ଟୀ, ରାଜ କୁନ୍ଦ୍ରାଙ୍କ ସମେତ ଅନ୍ୟ ସମସ୍ତ ଅଭିଯୁକ୍ତଙ୍କ ବିରୋଧରେ ଏଫ୍ଆଇଆର୍ ପଞ୍ଜିକରଣ କରିଛି। ଏଥିମଧ୍ୟରେ ୪୨୦ (ପ୍ରତାରଣା), ୧୨୦-ବି (ଅପରାଧିକ ଷଡଯନ୍ତ୍ର), ୫୦୬ (ଅପରାଧିକ ଭୟ) ଏବଂ ୩୪ (ସାଧାରଣ ଉଦ୍ଦେଶ୍ୟ) ଅନ୍ତର୍ଭୁକ୍ତ । ଏହା ପରେ ବର୍ତ୍ତମାନ ମୁମ୍ବାଇ ପୋଲିସ ଏହି ମାମଲାରେ ଅଭିଯୁକ୍ତଙ୍କୁ ପଚରାଉଚରା କରିବ। ଏଥି ସହିତ ଏହି ମାମଲାରେ ରାଜ କୁନ୍ଦ୍ରା ଏବଂ ଶିଳ୍ପା ଶେଟ୍ଟୀଙ୍କ ପକ୍ଷ ଜାଣିବା ପାଇଁ ପୋଲିସ ଶୀଘ୍ର ସେମାନଙ୍କ ସହ ଯୋଗାଯୋଗ କରିବ ।
ଅଭିଯୋଗକାରୀ ଅଭିଯୋଗ କରିଛନ୍ତି ଯେ ଜୁଲାଇ ୨୦୧୪ ରେ, ଏସଏଫଏଲ ଫିଟନେସ କମ୍ପାନୀର ନିର୍ଦ୍ଦେଶକ କାଶୀଫ ଖାନ, ଶିଳ୍ପା ଶେଟ୍ଟୀ, ରାଜ୍ କୁନ୍ଦ୍ରା ଏବଂ ଅନ୍ୟମାନଙ୍କ ସହିତ ତାଙ୍କୁ କହିଥିଲେ ଯେ ଯଦି ସେ ତାଙ୍କ କମ୍ପାନୀର ଫ୍ରାଞ୍ଚାଇଜ୍ ନେଇ ପୁଣେର କୋରେଗାଓଁ ଅଞ୍ଚଳରେ ଜିମ୍ ଏବଂ ଏକ ସ୍ପା ଖୋଲିବେ ତେବେ ଏହା ତାଙ୍କ ପାଇଁ ବହୁତ ଲାଭଦାୟକ ହେବ । ସେମାନଙ୍କ କଥାନୁଯାୟୀ ବାରାଇ ୧ କୋଟି ୫୯ ଲକ୍ଷ ୨୭ ହଜାର ଟଙ୍କା ବିନିଯୋଗ କରିଥିଲେ, କିନ୍ତୁ ଏହା ପରେ ଅଭିଯୁକ୍ତ ତାଙ୍କ ଟଙ୍କାକୁ ନିଜ ସ୍ୱାର୍ଥରେ ବ୍ୟବହାର କରିଥିଲେ। କେବଳ ଏତିକି ନୁହେଁ ଯେତେବେଳେ ସେ ତାଙ୍କ ଟଙ୍କା ଫେରସ୍ତ ମାଗିଥିଲେ ସେତେବେଳେ ତାଙ୍କୁ ଧମକ ମଧ୍ୟ ଦିଆଯାଇଥିଲା।
