ନୂଆଦିଲ୍ଲୀ (ଏଟିଆର ବ୍ୟୁରୋ): ମଥାରେ ଟମାଟ, କାନରେ ଟମାଟ,ହାତରେ ବି ଟମାଟ ଆଉ ବେକରେ ଝୁଲୁଛି ଏକ ଲମ୍ବା ଟମାଟ ମାଳ । ଏହା କୌଣସି ଟମାଟ ମାର୍କେଟର ଦୃଶ୍ୟ ନୁହେଁ ବରଂ ଏକ ନବବଧୂ ନିଜ ବାହାଘର ପାର୍ଟିରେ ପୂରା ଶରୀରକୁ ଟମାଟରରେ ସଜେଇ ହୋଇଛନ୍ତି । ଏଭଳି ଏକ ଦୃଶ୍ୟ ଏବେ ପାକିସ୍ତାନରୁ ସାମ୍ନାକୁ ଆସିଛି । ଆଜ୍ଞା ହଁ ଏବେ ପାକିସ୍ତାନରେ ଟମାଟ ଦର ଆକାଶ ଛୁଆଁ । ଯାହା ସାଧାରଣ ଜନତାଙ୍କ ପାଇଁ ଚିନ୍ତାର ବିଷୟ ପାଲଟିଛି । ପାକିସ୍ତାନରେ ସୁନା ଦର ସହ ଟମାଟ ଦରକୁ ତୁଳନା କରାଯାଉଛି । ଇତି ମଧ୍ୟରେ ଏହି ଟମାଟ ଦର ବୃଦ୍ଧିକୁ ନେଇ ଏକ ନିଆରା ଦୃଶ୍ୟ ଦେଖିବାକୁ ମିଳିଛି । ପ୍ରକୃତରେ ପାକିସ୍ତାନର ଏକ ଯୁବତୀ ତାଙ୍କ ବାହାଘରରେ ସୁନା ଗହଣା ବଦଳରେ ଟମାଟରେ ସଜେଇ ହୋଇଛନ୍ତି । ଯାହାର ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି ।
Tomato jewellery. In case you thought you've seen everything in life.. pic.twitter.com/O9t6dds8ZO
— Naila Inayat नायला इनायत (@nailainayat) November 18, 2019
ନବବଧୂ ଜଣଙ୍କ ଏଭଳି ନିଆରା ଢଙ୍ଗରେ ସଜେଇ ହୋଇଥିବାର ଦେଖି ସାମ୍ବାଦିକ ପ୍ରଶ୍ନ କରିବାରୁ ସେ ଏହାର ଏକ ରୋଚକ ଜବାବ ଦେଇଛନ୍ତି । ନବବଧୂ ଜଣକ କହିଛନ୍ତି, ସୁନା ଦର ମହଙ୍ଗା ହେବାରେ ଲାଗିଛି । ଏହାସହିତ ଟମାଟର ଦର ବି ଆହୁରୀ ଅଧିକ ବଢିଗଲାଣି । ସେଥିପାଇଁ ମୁଁ ମୋ ବାହାଘରରେ ଟମାଟରର ଗହଣା ପିନ୍ଧିଛି । କେବଳ ଏତିକି ନୁହେଁ ମୋ ବାପା-ମା ଯୌତୁକରେ ମୋତେ ତିନି ପେଟି ଟମାଟ ଦେଇଛନ୍ତି ।
ସବୁଠାରୁ ମଜା କଥା ହେଉଛି ଯେତେବେଳେ ସାମ୍ବାଦିକ ଜଣଙ୍କ ନବ-ବଧୂଙ୍କ ଇଣ୍ଟରଭ୍ୟୁ ନେବା ବେଳେ ତାଙ୍କ ଶରୀରରେ ଲଗା ହୋଇଥିବା ଟମାଟକୁ ଛୁଇଁ ଦେଇଥିଲେ, ସେହି ସମୟରେ ନବବଧୂ ଜଣଙ୍କ ଚିହିଁକି ଉଠିବା ସହ ଟମାଟରକୁ ଛୁଇଁବା ପାଇଁ ମନା କରିଥିଲେ ।
