ଭୁବନେଶ୍ୱର,୭।୨/(ବ୍ୟୁରୋ) : ରାତିରେ ଏକୁଟିଆ ବୁଢା ବୟସରେ ରାସ୍ତା ପାର୍ ହେଉଥିଲେ । ହେଲେ ଆଜି ରାତି ଯେ ତାଙ୍କ ପାଇଁ କାଳ ରାତି ସାଜିବ ତାହା ସେ କେବେବି ଭାବି ନଥିଲେ । ବରମୁଣ୍ଡା କାଳିମନ୍ଦୀର ସାମ୍ନାରେ ଆଜି ରାତିରେ ମିନିଟ୍ରକ ଧକ୍କାରେ ଜଣେ ବୃଦ୍ଧଙ୍କର ମୃତ୍ୟୁ ହୋଇଛି । ତାଙ୍କ ପରିଚୟ ମିଳିପାରି ନାହିଁ । ପୁଲିସ ମୃତ ଦେହକୁ ଜବତ କରି ବ୍ୟବଚ୍ଛେଦ ପାଇଁ କ୍ୟାପିଟାଲ ହସ୍ପିଟାଲ ପଠେଇଛି । ସେହିପରି ଦୁର୍ଘଟଣା ଭିଆଇଥିବା ମହିନ୍ଦ୍ରାର ଡାଲା ଗାଡି (ଓଡି-02-ୟୁ-6106) କୁ ପୁଲିସ ଜବତ କରିଛି ।
ସୂଚନା ମୁତାବକ, ଆଜି ରାତି ୯ଟା ସମୟରେ ଜଣେ ବୃଦ୍ଧ ଲୋକ ବରମୁଣ୍ଡା କାଳୀମନ୍ଦୀର ସାମ୍ନାରେ ରାସ୍ତା ପାର୍ ହେଉଥିଲେ । ଏହି ସମୟରେ ବାଣୀବିହାରରୁ ଖଣ୍ଡଗିରି ଛକ ଆଡେ ଯାଉଥିବା ଏକ ମହିନ୍ଦ୍ର ଭ୍ୟାନ୍ ତାଙ୍କୁ ଧକ୍କା ଦେଇଥିଲା । ଫଳରେ ସେ ଛିଟିକି ହୋଇ ପଡିଥିଲେ । ଅନେକ ସମଯ ପର୍ଯ୍ୟନ୍ତ ତାଙ୍କ ମୃତ ଦେହ ସେଠାରେ ପଡିରହିଥିଲା । ଖବର ପାଇ ଥାନା ପୋଲିସ ପହଞ୍ଚିଲା ବେଳକୁ ଚାଳକ ଜଣଙ୍କ ଫେରାର୍ ହୋଇଯାଇଥିଲେ । ଘଟଣାସ୍ଥଳରେ ଉକ୍ତ ବୃଦ୍ଧ ବ୍ୟକ୍ତିଙ୍କର ମୃତ୍ୟୁ ହୋଇଥିଲା ।
