ଆଲୋକଙ୍କ ଭୁଲ ରହିଲା କେଉଁଠି

ଭୁବନେଶ୍ୱର,(ଏଟିଆର ବ୍ୟୁରୋ): ହାତି ଖସିଯାଉଛି ହେଲେ ପିମ୍ପୁଡି ଯାଇ ପାରୁନି । ଏହି ଉକ୍ତିକୁ ପୁଣି ପ୍ରମାଣ କରିଛି ପୁଲିସ ବିଭାଗ । ରେକର୍ଡ କହୁଛି ଅନେକ ବରିଷ୍ଠ ଅଧିକାରୀ ରହିଛନ୍ତି ଯେଉଁମାନଙ୍କ ନାଁରେ ଏକାଧିକ ଅଭିଯୋଗ ଉଠିଛି । ମାମଲା ମାନବାଧିକାର କମିଶନରଙ୍କ ନିକଟରେ ମଧ୍ୟ ପହଁଚିଛି । କିନ୍ତୁ ଠିକଣା ବେଳକୁ ସେମାନଙ୍କ ଲାଗି ସବୁ ଠିକ । ହେଲେ ଏପଟେ ଢ଼େରଦିନ ହେବ ସଚ୍ଚୋଟରେ ଥାଇ ମଧ୍ୟ ଏ ଅଫିସରୁ ସେ ଅଫିସକୁ ଦୌଡି ଦୌଡି ଜଣେ ଦକ୍ଷ ପୁଲିସ ଅଫିସରଙ୍କ ଚପଲ ଘୋରି ହୋଇଯାଉଥିଲେ ମଧ୍ୟ କେହି ଶୁଣିବାକୁ ନାରାଜ ।

ସାଲିସ କରିପାରୁନଥିବା ଏହି ଦକ୍ଷ ଅଫିସରଙ୍କ ପ୍ରତି ଏଭଳିି ଅନ୍ୟାୟକୁ ନେଇ ଏବେ ଉଠିଛି ପ୍ରତିବାଦର ସ୍ୱର । ତୁରନ୍ତ ବିଭାଗ ଏଥିପ୍ରତି ନଜର ନଦେଲେ ଆଗକୁ ଏହା ଆନ୍ଦୋଳନର ରୂପ ନେବ ବୋଲି ଚେତବାନୀ ଦେଇଛନ୍ତି ଜନତା । ଆମେ କହୁଛୁ ପୁଲିସ କମ ବରଂ ଏନକାଉଁଟର ସେଷ୍ପାଲିଷ୍ଟ ଭାବେ ବେଶ ଜଣାଥିବା ଆଲୋକ ଜେନାଙ୍କ ସମ୍ପର୍କରେ । ଦିନ ଥିଲା ତାଙ୍କର କାର୍ଯ୍ୟରେ ନିଶ ଫୁଲାଇ ବାହାଷ୍ଫୋଟ ମାରୁଥିଲା ପୁଲିସ । ଯେଉଁ ଅପରାଧୀଙ୍କୁ ଧରିବାକୁ ଯାଇ ଅନେକ ଅଫିସର ନାକେଦମ ହେଉଥିଲେ ସେଠି ନିଜର ସାହାସ ଓ ଦକ୍ଷତା ବଳରେ ଖୁବ କମ ସମୟ ମଧ୍ୟରେ ଅପରାଧୀଙ୍କୁ ଖୁଆଡ ଦେଖାଉଥିଲେ ଆଲୋକ ଜେନା ।

ଲିଙ୍ଗରାଜ ଥାନା ଅଧିକାରୀ ଥିବା ବେଳେ ବାଡୁ ହତ୍ୟା ମାମଲା ତ’ ତାଙ୍କୁ ଆଣିଦେଇଥିଲା ଅନେକ ସଫଳତା । ଯେଉଁଥିରେ ଗିରଫ ହୋଇଥିଲେ ୫ଜଣ କୁଖ୍ୟାତ ଅପରାଧୀ । ଗୋଟିଏ ପରେ ଗୋଟିଏ ସଫଳତା ହାସଲ କରି ଚାଲିଥିବା ଆଲୋକ ଜେନାଙ୍କୁ ଖାସ କରି ଏଥିପାଇଁ ସ୍ପେଶାଲ ସ୍କ୍ୱାଡରେ ଭର୍ତି କରାଯାଇଥିଲା । ଏଠାରେ ରହିବା ପରେ ମଧ୍ୟ ସେ ଅନେକ ଅପରାଧୀଙ୍କ ବ୍ୟାଣ୍ଡ ବଜାଇଥିଲେ । ଯେଉଁଥିପାଇଁ ସହରବାସୀ ଶାନ୍ତିରେ ନିଶ୍ୱାସ ମାରିବାକୁ ସକ୍ଷମ ହୋଇଥିଲେ । ଏପରି ଜଣେ ଅଫିସର ଆଜି କିନ୍ତୁ ଅବହେଳିତ । ତାହା ପୁଣି ବଡବଡିଆ ବାବୁଙ୍କ ଲାଗି । ଯେଉଁ ବାବୁମାନେ ଦିନେ ସେହି ଆଲୋକ ଜେନାଙ୍କ ପାଇଁ ସେମାନଙ୍କ ବଡ଼ ବାବୁଙ୍କ ପାଖରେ ଛାତି ଫୁଲାଇ ଠିଆ ହେଉଥିଲେ ।

କିନ୍ତୁ ଚକ୍ରାନ୍ତର ଶିକାର ଆଉ ଚାପର ବଶବର୍ତି ହୋଇ ଆଲୋକ ଜେନା ଭିଆରଏସ ଲାଗି ଆବେଦନ କରିଥିବା ବେଳେ ବିଭାଗୀୟ ଅଧିକାରୀ ଚୂପ ରହିବା ଅନେକ ପ୍ରଶ୍ନ ଛିଡା କରିଛି । ପ୍ରଶ୍ନ ଉଠୁଛି ଆଲୋକ ଜେନାଙ୍କ ଉପରେ କାହିଁକି ଏତେ ରାଗ? ଶୁଣିବାକୁ ମିଳୁଛି ସଚ୍ଚୋଟ ଅଫିସର ଭାବେ ଜଣେ ମନ୍ତ୍ରୀଙ୍କ ଭାଇକୁ ଜେଲ ପଠାଇଥିବାର ଏ ହେଉଛି ପରିଣାମ? ଯଦି ଏହା ସତ ହୁଏ ତେବେ ଏହା ଆଗାମୀ ଦିନ ଲାଗି ସାଙ୍ଘାତିକ ହେବ । ଏଠାରେ ସୂଚନାଯୋଗ୍ୟ କେନ୍ଦ୍ରାପଡାରେ ଏସିପି ଥିବା ବେଳେ ସାରଥୀ ମାମଲାରେ ବିବାଦୀୟ ପରିସ୍ଥିତିକୁ ଆସିଥିଲେ ସତିଶ ଗଜଭିୟେ । ଏବେ ସେ ମୁକ୍ତ ହୋଇଥିବା ବେଳେ ଏକ ଛୋଟିଆ ଘଟଣାରେ କିନ୍ତୁ ଘାଁଟିଚକଠଟି ହେଉଛନ୍ତି ଆଲୋକ । ଏହା କେତେଦୂର ଠିକ? ସବୁଠୁ ବଡ଼ କଥା ହେଉଛି ସହିଦନଗର ଥାନାରେ ଥିବା ବେଳେ କୁଳଦୀପ ଘଟଣାରେ ବିବାଦରେ ଛନ୍ଦି ହୋଇଥିଲେ ଆଲୋକ ଜେନା ।

ଯେତେବେଳେ କି’ ପ୍ରେସମିଟ ଜରିଆରେ ଡିସିପି କୁଳଦୀପର କାହାଣୀ ବଖାଣି ସେ ହସପିଟାଲରେ ଥିବା କହିଥିଲେ । କିନ୍ତୁ ସେତେବେଳକୁ କୁଳଦୀପ ଦୁନିଆଁ ଛାଡି ସାରିଥିଲେ । ଏଠି ପ୍ରଶ୍ନ ଏହି ଘଟଣା ପାଇଁ କାହିଁକି ଦାୟୀ ହେବେ ନି ଡିସିପି? ସବୁବେଳେ ତଳିଆ କର୍ମଚାରୀଙ୍କୁ ବଳି ଦେଇ କାହିଁକି ଖସିଯାଉଛନ୍ତି ବରିଷ୍ଠ ଅଧିକାରୀ । ଏ ଗୋଟିଏ ଘଟଣା ନୁହେଁ ପୁଲିସ ରେକର୍ଡ କହୁଛି ଏମିତି ଅନେକ ଘଟଣା ଘଟିଛି ଯେଉଁଥିରେ ତଳିଆ କର୍ମଚାରୀ ହିଁ ବେଶି ଅଡୁଆରେ ପଡିଛନ୍ତି । ତେବେ ସେ ଯାହା ହେଉ ଆଲୋକ ଜେନାଙ୍କ ଭଳି ଜଣେ ଅଫିସରଙ୍କୁ ଜାଣିଶୁଣି ଚାପରେ ରଖାଯାଉଥିବା ଘଟଣା ନିହାତି ଭାବେ ନିନ୍ଦନୀୟ ବୋଲି ଚର୍ଚ୍ଚା ହେଉଛି ।

ସବୁଠୁ ବଡ଼ କଥା ହେଉଛି ୧୦ଜଣ ବିବାଦୀୟ ଅଫିସରଙ୍କୁ ବିଭାଗ ମାଫ କରିଥିବା ବେଳେ ଆଲୋକଙ୍କ ପ୍ରତି ଅନ୍ୟାୟ କରିବା ସତରେ ବିଭାଗର ମନମାନିକୁ ପଦାରେ ପକାଇଛି । ଖୁବ ଶୀଘ୍ର ଏହା ଉପରେ ପଦକ୍ଷେପ ନେବା ଲାଗି ଦାବି ହୋଇଛି ।

ବାଃ ବାଃରେ ବିଭାଗ : ଆଲୋକଙ୍କ ଉପରେ ଅମାବାସ୍ୟାର ଛିଟା