ଭୁବନେଶ୍ୱର (ଏଟିଆର ବ୍ୟୁରୋ): ଶୀତ ଋତୁରେ ଲୋକେ ପିକିନିକ୍ ଯିବାକୁ ଅଧିକ ପସନ୍ଦ କରିଥାନ୍ତି । ସେହିଭଳି ପିକନିକ୍ ସିଜିନ୍ ରେ ଭିତରକନିକାରେ ମଧ୍ୟ ପର୍ଯ୍ୟଟକଙ୍କ ଭିଡ ଦେଖିବାକୁ ମିଳିଥାଏ । ମାତ୍ର ଚଳିତ ଡିସେମ୍ବର ମାସ ୨୬ ତାରିଖରୁ ଆସନ୍ତା ଜାନୁଆରୀ ମାସ ୪ ତାରିଖ ଯାଏଁ ବନ୍ଦ ରହିବ ଭିତରକନିକା । ଏହି ସମୟରେ ପର୍ଯ୍ୟଟକମାନେ ଭିତରକନିକା ବୁଲିବା ପାଇଁ ଯାଇ ପାରିବେ ନାହିଁ । ବଉଳା କୁମ୍ଭୀର ଗଣନା କରାଯିବାକୁ ନେଇ ବନବିଭାଗ ପକ୍ଷରୁ ଏହି ନିଷ୍ପତି ନିଆଯାଇଛି ।
ପ୍ରତ୍ୟେକ ବର୍ଷ ଏହି ସମୟରେ କୁମ୍ଭୀର ଗଣନା କରାଯାଇଥାଏ । କାରଣ ଏହି ସମୟରେ ଅଧିକ ମାତ୍ରାର କୁମ୍ଭୀର ଦୃଶ୍ୟମାନ ହୋଇଥାନ୍ତି । ଜୁଆର ଯୋଗୁଁ କୁମ୍ଭୀରମାନେ ଉପରକୁ ଉଠିଯାଇଥାନ୍ତି । ମାତ୍ର କୁମ୍ଭୀର ଗଣନା ସମୟରେ ଯେପରି କୌଣସି ଅସୁବିଧା ନଉପୁଜେ ସେଲାଗି ବନବିଭାଗ ପକ୍ଷରୁ ପର୍ଯ୍ୟଟକମାନଙ୍କ ପାଇଁ ଭିତରକୁ ଯିବା ନିଷେଧ ଥାଏ ।
