ପୁରୀ(ଏଟିଆର ବ୍ୟୁରୋ):ଯୁବପିଢିଙ୍କ ମଧ୍ୟରେ ଅର୍ଥ କମାଇବାର ନିଶା ଏତେ ମାତ୍ରାରେ ବଢି ଗଲାଣି ଯେ ସେମାନେ ନିଜର ଭବିଷ୍ୟତକୁ ବାଜି ଲଗାଇବାକୁ ପଛାଉ ନାହାନ୍ତି । ପାଠପଢି ଭବିଷ୍ୟତ ଗଢିବା ପରିବର୍ତ୍ତେ ଯୁବପିଢି ଖରାପ ବାଟରେ ଯିବାରେ ଲାଗିଛନ୍ତି । ଏହିଭଳି ଏକ ଘଟଣା ଘଟିଛି ପୁରୀ ଜିଲ୍ଲା ନିମାପଡାରେ, ଯେଉଁଠି ଦୁଇ ଯୁବକଙ୍କଠାରୁ ମିଳିଛି ୨୪ଗ୍ରାମର ବ୍ରାଉନ ସୁଗାର । ମିଳିଥିବା ଏହି ବ୍ରାଉନ ସୁଗାରର ମୂଲ୍ୟ ପାଖାପାଖି ୨ଲକ୍ଷ ୫୦ ହଜାର ହେବ ବୋଲି ଅନୁମାନ କରାଯାଉଛି । ଏହି ଯୁବକ ଦୁଇଜଣ ପଦାର୍ଥ ବିଜ୍ଞାନରେ ଯୁକ୍ତ ତିନିର ଶେଷ ବର୍ଷର ଛାତ୍ର । ସୂଚନା ମୁତାବକ ନିମାପଡା ଜୟଶ୍ରୀ ହଲ ଛକରୁ ଅବକାରୀ ବିଭାଗ କର୍ମଚାରୀମାନେ ଚଢାଉ କରିବା ବେଳେ ବ୍ରାଉନ ସୁଗାର ସହ ଦୁଇ ଯୁବକଙ୍କୁ ଗିରଫ କରିଛି । ସବୁଠାରୁ ବଡ କଥା ହେଉଛି ଏହି ଦୁଇ ଯୁବକଙ୍କ ମଧ୍ୟରୁ ଜଣଙ୍କର ବାପା ଏବଂ ମା ପୋଲିସ ବିଭାଗରେ ଏଏସ୍ଆଇ ଅଛନ୍ତି । ପୁରୀରେ ବ୍ରାଉନ ସୁଗାର ବ୍ୟବସାୟ ଦିନକୁ ଦିନ ବଢୁଥିବାରୁ ଜିଲ୍ଲାପାଳଙ୍କ ନିର୍ଦ୍ଦେଶକ୍ରମେ ଅବକାରୀ ବିଭାଗ କର୍ମଚାରୀ ବିଭିନ୍ନ ସ୍ଥାନରେ ଚଢାଉ କରିଥିଲେ ।
