କେନ୍ଦ୍ରାପଡା(ଏଟିଆର ବ୍ୟୁରୋ): କେନ୍ଦ୍ରାପଡା ସହରରେ ଦିନକୁ ଦିନ ଅପରାଧ ବଢିବାରେ ଲାଗିଛି । କେତେ ବେଳେ ଦିନ ଦିପହରେ ବ୍ୟବସାୟୀଙ୍କୁ ଗୁଳି ମାଡ ତ ଆଉ କେତେ ବେଳେ ଲୁଟ । କେନ୍ଦ୍ରାପଡା ପୋଲିସ ଏଥି ପାଇଁ ଅପରାଧି ମାନଙ୍କୁ ଧରିବା ପାଇଁ ବହୁ ଚେଷ୍ଟା କରୁଥିଲା । ତେବେ ଗତ କାଲି ରାତିରେ କେନ୍ଦ୍ରପଡା ପୋଲିସର ଗୁଳିରେ କୁଖ୍ୟାତ ଅପରାଧି ହୃଷିକେଶ ମଲ୍ଲିକ ଆହାତ ହୋଇଛି । ସୂଚନା ଅନୁସାରେ ଗତକାଲି ହୃଷିକେଷ ଓ ତାର ୫ଜଣ ସାଥୀ ଗରାପୁର ଅଞ୍ଚଳରେ ଏକ ବଡ ଧରଣର ଡକାୟତୀ ଯୋଜନା କରୁଥିଲେ ।
ଖବର ପାଇ କେନ୍ଦ୍ରାପଡା ପୋଲିସ ସେମାନଙ୍କ ଉପରେ ଚଢାଉ କରିଥିଲା । ଏହି ସମୟରେ ହୃଷିକେଶ ପୋଲିସ ଉପରକୁ ଗୋଟିଏ ରାଉଣ୍ଡ ଗୁଳି ଚଳାଇ ସେଠାରୁ ଖସି ପଳାଇବାକୁ ଚେଷ୍ଟା କରିଥିଲା । ତେବେ ପୋଲିସ ଓ ହୃଷିକେଶର ସାଥୀ ମାନଙ୍କୁ କିଛି ସମୟ ପିଛା କରିବା ପରେ ଗରାପୁର ରାସ୍ତାରେ ଥିବା ଏସପିଙ୍କ ବାସଭବନ ପାଖରେ ପୋଲିସ ସେମାନଙ୍କୁ ଘେରିଯାଇ ଏନକାଉଣ୍ଟର କରିଥିଲା । ପୋଲିସର ଗୁଳି ମାଡରେ ହୃଷିକେଶର ଆହତ ହୋଇ ପଡିଥିଲା । ହୃଷିକେଶର ଦୁଇ ଗୋଡରେ ଗୁଳି ବାଜିବା ବେଳେ ତାର ସାଥୀ ମାନେ ସେଠାରୁ ଖସି ପଳାଇଥିଲେ । ତେବେ ପୋଲିସ ହୃଷିକେଶକୁ ଗିରଫ କରି ଚିକିତ୍ସା ପାଇଁ କେନ୍ଦ୍ରପଡା ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଇଥିଲା । ଘଟଣା ସ୍ଥଳରୁ ପୋଲିସ ଗୋଟିଏ ଚାରି ଚକିଆ ଗାଡି, ଭୁଜାଲି ଜବତ କରିଛି । ଏହା ସହ ହୃଷିକେଶର ସାଥୀ ମାନଙ୍କୁ ଧରିବା ପାଇଁ ପୋଲିସ ବିଭିନ୍ନ ଯାଗାରେ ଚଢାଉ କରୁଛି ।
