ଭୁବନେଶ୍ୱର,(ଏଟିଆରବ୍ୟୁରୋ): କମିଶନରେଟ ପୁଲିସର ନୟାପଲ୍ଲୀ ଥାନାକୁ ମିଳିଛି ଏକ ବଡ଼ ସଫଳତା । ଠାବ ହୋଇଛି ୪ଜଣିଆ ଲୁଟେରା ଗ୍ୟାଙ୍ଗ । ସେମାନଙ୍କ ପାଖରୁ ବାଇକ୍, ମୋବାଇଲ ସମେତ ନଗଦ ୨ଲକ୍ଷ ୨୪ହଜାର ଟଙ୍କା ଜବତ କରାଯାଇଛି । ଗିରଫ ଅଭିଯୁକ୍ତମାନେ ହେଲେ କାର୍ତ୍ତିକ ନାୟକ, ଗଣେଷ ନାୟକ, ଭୁବନ ମହାନ୍ତି ଓ ଅମିତ ପରିଡ଼ା ।
ପୁଲିସ ରିପୋର୍ଟ ଅନୁସାରେ, ନୟାପଲ୍ଲୀ ଅଞ୍ଚଳରେ ରହୁଥିବା କୈଳାଶ ପ୍ରଧାନଙ୍କ ଘରୁ ଲୁଟ୍ ହୋଇଥିଲା । ପାଖାପାଖି ୯ଲକ୍ଷ ଟଙ୍କା ଲୁଟି ଫେରାର ହୋଇଯାଇଥିଲେ ଦୁର୍ବୃତ୍ତ । ନିଜ ଜମି ବିକ୍ରି କରି କୈଳାଶ ରଖିଥିବା ଏସବୁ ଟଙ୍କାକୁ ଘରଭାଙ୍ଗି ଦୁର୍ବୃତ୍ତମାନେ ନେଇଯିବା ପରେ ସେ ଏ ସମ୍ପର୍କରେ ଥାନାରେ ଅଭିଯୋଗ କରିଥିଲେ ।
ପୁଲିସ ଅଭିଯୋଗକୁ ଭିତ୍ତି କରି ତଦନ୍ତ ଆରମ୍ଭ କରିଥିଲା । ପ୍ରାଥମିକ ପର୍ଯ୍ୟାୟରେ ପୁଲିସ ସିସିଟିଭି ଫୁଟେଜ ଜବତ କରିଥିଲା । ଫୁଟେଜରୁ ଅଭିଯୁକ୍ତଙ୍କ ସମ୍ପର୍କରେ ଖବର ପାଇବା ପରେ ଏବେ ସମସ୍ତଙ୍କୁ ଗିରଫ କରିଛି । ନୟାପଲ୍ଲୀ ପୁଲିସର ଏଭଳି ଅପରେସନକୁ ସ୍ଥାନୀୟ ଲୋକେ ବାହାବାଃ ଜଣାଇଛନ୍ତି ।
