ଭୁବନେଶ୍ୱର(ଏଟିଆର ବ୍ୟୁରେ): ରାଜଧାନୀ ଭୁବନେଶ୍ୱରକୁ ସୁରକ୍ଷିତ ରଖିବା ପାଇଁ ପୋଲିସ ପ୍ରଶାସନ ପକ୍ଷରୁ ବିଭିନ୍ନ ପ୍ରକାରର ପଦକ୍ଷେପ ନିଆଯାଉଛି । ଦିନ ରାତି ପୋଲିସ ଦ୍ୱାରା ପାଟ୍ରୋଲିଙ୍ଗ ମଧ୍ୟ କରାଯାଉଛି । ହେଲେ କିଛି ଲାଭ ମିଳୁ ନାହିଁ । ରାଜଧାନୀ ଭୁବନେଶ୍ୱରରେ ଦିନକୁ ଦିନ ଅପରାଧ ବଢିବାର ଲାଗିଛି । କେଉଁଠି ଲୁଟ ହେଉଛି ତ ଆଉଁ କେଉଁଠି ଦିନ ଦ୍ୱିପହରରେ ଗୁଳି ଫୁଟୁଛି । ସେହି ଭଳି ୟୁନିଟ ୮ ସ୍ଥିତ ପାସପୋର୍ଟ ଅଫିସ ସମ୍ମୁଖରେ ଜଣେ ଯୁବକଙ୍କୁ ୨ ଜଣ ଦୁର୍ବୃତ୍ତ ଗୋଡାଇ ଗୋଡାଇ ହତ୍ୟା କରିବାକୁ ଚେଷ୍ଟା କରିଛନ୍ତି ।
ସୂଚନା ଅନୁସାରେ ଆହତ ଯୁବକ ପ୍ରମୋଦ ସାହୁ କୌଣସି କାମରେ ପାସପୋର୍ଟ ଅଫିସ ସମ୍ମୁଖକୁ ଯାଇଥିଲେ । ଏହି ସମୟରେ ଦୁଇ ଜଣ ଦୁର୍ବୃତ୍ତ ଅଚାନକ ପ୍ରମୋଦଙ୍କୁ ମାରଣାସ୍ତ୍ରରେ ହତ୍ୟା କରିବା ପାଇଁ ଆକ୍ରମଣ କରିଥିଲେ । ନିଜର ଜୀବନକୁ ବଞ୍ଚାଇବା ପାଇଁ ପ୍ରମୋଦ ସେଠାରୁ ଖସି ପଳାଇବାକୁ ଉଦ୍ୟମ କରିଥିଲେ । ତେବେ ଯୁବକ ମାନେ ପ୍ରମୋଦଙ୍କ ପଛରେ ଗୋଡାଇ ତାଙ୍କୁ ଆକ୍ରମଣ କରିଥିଲେ । ଖବର ପାଇ ଘଟଣା ସ୍ଥଳରେ ପୋଲିସ ପହଞ୍ଚି ଜଣଙ୍କୁ କାବୁ କରିଛି । ଅନ୍ୟ ଜଣେ ଦୁର୍ବୃତ୍ତ ସେଠାରୁ ଫେରାର ହୋଇଯାଇଛି । ପ୍ରମୋଦଙ୍କୁ ଗୁରୁତର ଅବସ୍ଥାରେ କ୍ୟାପିଟାଲ ହସ୍ପିଟାଲରେ ଭର୍ତ୍ତି କରାଯାଇଛି । ଘଟଣା ସ୍ଥଳରେ ନୟାପଲ୍ଲୀ ଥାନା ଅଧିକାରି ପହଞ୍ଚି ତଦନ୍ତ ଆରମ୍ଭ କରିଛି । ପ୍ରମୋଦଙ୍କୁ ଆକ୍ରମଣ କରାଯାଇଥିବା କାରଣ ଅସ୍ପଷ୍ଟ ରହିଛି ।
