ମୟୂରଭଞ୍ଜ (ଏଟିଆର ବ୍ୟୁରୋ) ; ଦିନକୁ ଦିନ ବଢ଼ି ଚାଲିଛି ଅପରାଧ । ନିଜକୁ ଅସୁରକ୍ଷିତ ମନେ କରୁଛନ୍ତି ନାରୀ ସମାଜ । ସେ ନାବାଳିକା ହେଉ ବା ମହିଳା । ସମସ୍ତଙ୍କ ଉପରେ ବଢ଼ିବାରେ ଲାଗିଛି ଅତ୍ୟାଚାର । ଅପାରାଧୀ ମାନେ ପୋଲିସ ଆଖିରେ ଧୂଳି ଦେବା ପାଇଁ ଦିନକୁ ଦିନ ନୂଆ ନୂଆ ଉପାୟରେ ଅପରାଧ କରୁଛନ୍ତି । ଜନ ବସତି ସ୍ଥାନରେ କାଳେ କେହି ଦେଖିଦେବ ଏଣୁ ଏମାନେ ଘର ଠାରୁ ଦୂରକୁ ନେଇ କରିଥାନ୍ତି ହତ୍ୟା । ତେବେ ଏଭଳି ଏକ ଅଭାବନୀୟ ଘଟଣା ଦେଖିବାକୁ ମିଳିଛି ମୟୂରଭଞ୍ଜ ଜିଲ୍ଲା ଯାମଦା ଥାନା ଅନ୍ତର୍ଗତ ମାଟିଆଳି ଗାଁରେ । ସ୍ଥାନୀୟ ଅଞ୍ଚଳର ଜଙ୍ଗଲରୁ ଜଣେ ଅଜଣା ମହିଳାଙ୍କ ଗଳିତ ମୃତ ଦେହ ଉ଼ଦ୍ଧାର ହୋଇଛି ।
ଏହି ଅଜଣା ମହିଳାଙ୍କ ମୃତ ଦେହକୁ ଦେଖିବା ପରେ ସ୍ଥାନୀୟ ଅଞ୍ଚଳରେ କୋଳାହଳ ସୃଷ୍ଟି ହୋଇଥିଲା । ପରେ ଗାଁ ଲୋକ ପୋଲିସକୁ ଖବର ଦେବା ପରେ ପୋଲିସ ଘଟଣାସ୍ଥଳରେ ପହଁଞ୍ଚି ମହିଳାଙ୍କ ମୃତ ଦେହ ଉ଼ଦ୍ଧାର କରି ଶବ ବ୍ୟବଛେଦ କରିଛି । ପୋଲିସ ପକ୍ଷରୁ ମିଳିଥିବା ସୂଚନା ମୁତାବକ ମହିଳାଙ୍କ ଗୋଟିଏ ଗୋଡ ଏବଂ ଗୋଟିଏ ହାତରେ ଆଘାତ ଲାଗିଛି । ତେବେ କିଏ କେଉଁ କାରଣ ପାଇଁ ହତ୍ୟା କରିଛି ଏ ସମ୍ପର୍କରେ ଜାଣିବା ପାଇଁ ପୋଲିସ ତଦନ୍ତ ଜାରି କରିଛି ।
