କେନ୍ଦ୍ରାପଡା (ଏଟିଆର ବ୍ୟୁରୋ); ବାଇକ ଚୋରୀ କରିବାକୁ ଆସିଥିଲେ ୬ଜଣ । ତେବେ ଲୋକମାନେ ଦେଖିଦେବାରୁ ୪ଜଣ ଫେରାର ହୋଇଯାଇଥିବା ବେଳେ ୨ଜଣ ପଡିଯାଇଥିଲେ ହାବୁଡରେ । ଧରା ହୋଇଥିବା ଦୁଇ ଚୋରଙ୍କୁ ନିର୍ଦ୍ଧୁମ ଛେଚିଥିଲେ ଲୋକ । କେନ୍ଦ୍ରାପଡା ଜିଲ୍ଲା ପଟ୍ଟାମୁଣ୍ଡାଇ ଥାନା ଅଞ୍ଚଳରେ ଘଟିଛି ଏଭଳି ଘଟଣା । ତେବେ ଏହି ଘଟଣା ଏବେ ସ୍ଥାନୀୟ ଅଞ୍ଚଳରେ ଚର୍ଚ୍ଚାର ବିଷୟ ହୋଇଛି ।
ମିଳିଥିବା ସୂଚନା ମୁତାବକ, ଗତକାଲି ରାତିରେ ରାଘପୁର ଗାଁରୁ ଶାସନ ଗାଁକୁ କିଶୋର ମଲ୍ଲିକ ନାମକ ଜଣେ ଯୁବକ ବରଯାତ୍ରୀରେ ଯାଇଥିଲେ । ତେବେ କନ୍ୟା ଘର ଆଗରେ ପହଁଞ୍ଚିବା ପରେ ସେ ବାଇକ ଥୋଇ ଭୋଜି ଖାଇବା ପାଇଁ ଯାଇଥିଲେ । ଅନ୍ଧାରରେ ଗାଡି ଥୁଆ ହୋଇଥିବାର ସୁଯୋଗ ନେଇ ୬ଜଣ ଚୋର କିଶୋରଙ୍କ ନୂଆ ପଲସର ଚୋରି କରିବା ପାଇଁ ଚେଷ୍ଠା କରିଥିଲେ ।
କୌଣସି କାମରେ ପୁଣିଥରେ ଗାଡି ପାଖକୁ ଆସୁଥିବା ବେଳେ କିଶୋର ତାଙ୍କ ଗାଡି ଚୋରି କରାଯାଉଥିବା ଦେଖିଥିଲେ । ଏହାପରେ ସେ ଚାଲାକ କରି ଗାଁ ଲୋକଙ୍କୁ ଜଣାଇଥିଲେ । ଏବଂ ଗାଁଲୋକଙ୍କ ସହାୟତାରେ ଚୋରଙ୍କୁ ଧରିବା ପାଇଁ ଚେଷ୍ଠା କରିଥିଲେ । ୪ଜଣ ଚୋର ଫେରାର ହୋଇ ଯାଇଥିବା ବେଳେ ଦୁଇ ଜଣ ହାବୁଡରେ ପଡିଯାଇଥିଲେ । ସେହି ଦୁଇଜଣଙ୍କୁ ଧରି ମନଇଛା ମାଡ ମାରିଥିଲେ ଲୋକ । ଏହାପରେ ସେମାନଙ୍କୁ ଚେତାବନୀ ମଧ୍ୟ ଦିଆଯାଇଥିଲା ।
