ମୟୁରଭଞ୍ଜ (ଏଟିଆର ବ୍ୟୁରୋ) ; ତାସ ଖେଳରୁ ହତ୍ୟା । ସାଙ୍ଗମାନଙ୍କ ସହ ତାସ ଖେଳରୁ ଆରମ୍ଭ ହେଲା ବଚସା । ମାତ୍ର ୪୦ ଟଙ୍କାକୁ ନେଇ ସୃଷ୍ଟି ହେଲା ଝଗଡା । ଫଳରେ ସାଙ୍ଗର ତଣ୍ଟିଚିପି ମାରିଦେଲେ ସାଙ୍ଗମାନେ । ଖାଲି ସେତିକି ନୁହେଁ ସାଙ୍ଗକୁ ମାରି ସାରିବା ପରେ ତାର ଶବକୁ ଜଙ୍ଗଲକୁ ନେଇଯାଇ ପୋତି ଦେଲେ । ଏଭଳି ଅଭାବନୀୟ ଘଟଣା ମୟୁରଭଞ୍ଜ ଜିଲ୍ଲା କପ୍ତିପଦା ଥାନା ଅନ୍ତର୍ଗତ ପଠାଣପକ୍କା ଗ୍ରାମରେ ଘଟିଛି ।
ମୃତକ ଜଣକ ହେଲେ ସେହି ଗ୍ରାମରେ ଚାମା ସିଜୋଇ । ସୂଚନା ଯୋଗ୍ୟ , ମାତ୍ର ୪୦ ଟଙ୍କାକୁ ନେଇ ଚାମାକୁ ତଣ୍ଟିଚିପି ହତ୍ୟା କରାଯାଇଛି । ଗତ ୧୭ ତାରିଖରେ ଚାମା ଗାଁ ପାଖ ହାଟକୁ ଯାଇଥିଲେ କିନ୍ତୁ ସେ ଆଉ ଫେରିନଥିଲେ । ପରିବାର ଲୋକେ ବହୁ ଖୋଜାଖୋଜି ମଧ୍ୟ କରିଥିଲେ ହେଁ ଚାମାଙ୍କୁ ପାଇନଥିଲେ । ତେବେ ଏହାକୁ ନେଇ ଥାନାରେ ଏତଲା ଦେଇଥିଲେ ଚାମାର ପରିବାର ଲୋକେ । ପୋଲିସ ଘଟଣାର ଖୋଡତାଡ ଆରମ୍ଭ କରି ଚାମାଙ୍କୁ ହତ୍ୟା କରାଯାଇଥିବା ସ୍ପଷ୍ଟ କରିଥିଲା ।
ତେବେ ଏହି ହତ୍ୟାକାଣ୍ଡର ମୁଖ୍ୟ ଅଭିଯୁକ୍ତ ସୁରେନ୍ଦ୍ରକୁ ଗିରଫ କରିଛି ପୋଲିସ । ଜଙ୍ଗଲରେ ପୋତାଯାଇଥିବା ଚାମାର ମୃତ ଦେହକୁ ମଧ୍ୟ ପୋଲିସ ଜବତ କରିଛି । ସେପଟେ ଏହି ହତ୍ୟାକାଣ୍ଡରେ ସମ୍ପୃକ୍ତ ଅନ୍ୟ ୨ ଜଣ ଏଯାଏ ଫେରାର ଅଛନ୍ତି । ପୋଲିସ ସେମାନଙ୍କୁ ଅତିଶିଘ୍ର ଗିରଫ କରିବ ବୋଲି ସୂଚନା ଦେଇଛି ।
