ଭୁବନେଶ୍ୱର(ଏଟିଆର ବ୍ୟୁରୋ): ରାଜଧାନୀ ଭୁବନେଶ୍ୱରରେ ଦିନକୁ ଦିନ ଅପରାଧୀକ ମାମଲା ବଢିବାରେ ଲାଗିଛି । କେତେ ବେଳେ ଗୁଳି ଫୁଟୁଛି ତ ଆଉ କେତେ ବେଳେ ଦିନ ଦ୍ୱିପହରରେ ହତ୍ୟା କାଣ୍ଡ ଘଟୁଛି । ତେବେ ଏହାରି ଭିତରେ ରାଜଧାନୀ ଭୁବନେଶ୍ୱରରେ ଏକ ଚାଞ୍ଚଲ୍ୟକର ଘଟଣା ଘଟିଛି । ଜଣେ ରାଜମିସ୍ତ୍ରୀଙ୍କୁ କାଠ ଫାଳିଆରେ ପିଠି ପିଠି ହତ୍ୟା କରାଯାଇଛି । ଏଭଲି ଏକ ହତ୍ୟାକାଣ୍ଡ ଘଟିଛି ଚନ୍ଦ୍ରଶେଖରପୁର କଲ୍ୟାଣ ମଣ୍ଡପ ନିକଟରେ ଥିବା ବସ୍ତିରେ । ସୂଚନା ଅନୁସାରେ ଗତକାଲି ବିଳମ୍ବିତ ରାତିରେ ରାଜମିସ୍ତ୍ରୀ ଦିପକ ଘର ବାହାରେ ବସିଥିଲେ । ଏହି ସମୟରେ ସନାତନ ମୁଣ୍ଡା ନାମକ ଜଣେ ଯୁବକ ସେଠାରେ ପହଞ୍ଚିଥିଲେ ।
କିଛି ସମୟ ପରେ ଦୀପକ ଓ ସନାତନଙ୍କ ମଧ୍ୟରେ ଯୁକ୍ତିତର୍କ ହୋଇଥିଲା । ଏଥିରେ ରାଗି ଯାଇ ସନାତନ ପାଖରେ ପଡିଥିବା କାଠ ଫାଳିଆରେ ଦୀପକଙ୍କୁ ପିଠି ପିଠି ହତ୍ୟା କରିଥିଲେ । ତେବେ ପୂର୍ବ ଶତ୍ରୁତା କାରଣରୁ ଏଭଳି ହତ୍ୟା କାଣ୍ଡ ଘଟିଥାଇ ପାରେ ବୋଲି ପୋଲିସକୁ ପ୍ରାଥମିକ ତଦନ୍ତରୁ ଜଣାପଡିଛି । ପୋଲିସ ସନାତନଙ୍କୁ ଗିରଫ କରି ପଚରାଉଚରା କରୁଛି । ତେବେ ଘଟଣା ସ୍ଥଳରେ ଆଜି ସକାଳେ ସାଇଣ୍ଟିଫିକ୍ ଟିମ୍ ପହଞ୍ଚି ତଦନ୍ତ କରୁଛି ।
