ବାଲେଶ୍ୱର ( ଏଟିଆର ବ୍ୟୁରୋ): ଆଉ ଦିନ କେଇଟା ପରେ ରାଜ୍ୟରେ ଚତୁର୍ଥ ପର୍ଯ୍ୟାୟ ନିର୍ବାଚନ । କେବଳ ପାଟକୁରାକୁ ଛାଡି ବାକି ରାଜ୍ୟରେ ସରିଯିବ ଗଣତନ୍ତ୍ରର ଏହି ମହାପର୍ବ । ଏସବୁ ଭିତରେ କିନ୍ତୁ ବିଜେଡି ଆଉ ବିଜେପିର ଆରୋପ ପ୍ରତ୍ୟାରୋପ ଥମିବାର ନାଁ ନେଉନି । ଗତକାଲି ମୋଦି କେନ୍ଦ୍ରାପଡା ଗସ୍ତରେ ଆସି ସେଠାରେ ସିଧା ନବୀନଙ୍କୁ ଟାର୍ଗେଟ କରିଥିଲେ । ଯାହାର ଜବାବ ଗତକାଲି ନବୀନ ଭଦ୍ରକରୁ ଦେଇଥିଲେ । ଏତିକିରେ କିନ୍ତୁ ଥମିଲା ନାହିଁ ।
ଆଜି ମୁଖ୍ୟମନ୍ତ୍ରୀ ଦଳୀୟ ନିର୍ବାଚନ ପ୍ରଚାରରେ ବାଲେଶ୍ୱର ଗସ୍ତରେ ଆସି ପୁଣି ମୋଦିଙ୍କୁ ଟାର୍ଗେଟ କରିଛନ୍ତି । ବିଜେପିକୁ ଆକ୍ଷେପ କରି ନବୀନ ତାଙ୍କ ମନ୍ତ୍ରୀମଣ୍ଡଳର ସପଥ ଗ୍ରହଣ ଉତ୍ସବରେ ଯୋଗ ଦେବାକୁ ମୋଦିଙ୍କୁ ନିମନ୍ତ୍ରଣ କରିଛନ୍ତି । ସେ କହିଛନ୍ତି ତୃତୀୟ ପର୍ଯ୍ୟାୟ ଭୋଟରେ ବିଜେଡି ଜିତି ସାରିଲାଣି । ଆହୁରୀ ମଧ୍ୟ ପୁରୁଣା କଥାକୁ ଦୋହରାଇ କହିଥିଲେ କି କେନ୍ଦର୍ରୁ କେହି ବିପର୍ଯ୍ୟୟ ବେଳେ ଓଡିଶାରେ ଦେଖାଯାଉ ନାହାନ୍ତି । କେବଳ ଭୋଟ ମାଗିବାକୁ ଆସୁଛନ୍ତି ।
ସେହିଭଳି ବାଲେଶ୍ୱର ମେଡିକାଲ କଲେଜ ପ୍ରସଙ୍ଗ ମଧ୍ୟ ଉଠାଇ ନବୀନ କେନ୍ଦ୍ରକୁ କଟାକ୍ଷ କରିଛନ୍ତି । ରାଜ୍ୟ ସରକାରଙ୍କ ଦ୍ୱାରା ମେଡିକାଲ ପାଇଁ ୨୫୦ କୋଟି ଟଙ୍କା ଖର୍ଚ୍ଚ ହୋଇଥିବା ବେଳେ କେନ୍ଦ୍ର ମାତ୍ର ୧୦୦ କୋଟି ଟଙ୍କା ଦେଇଛି ବୋଲି କହି କେନ୍ଦ୍ରକୁ ସମାଲୋଚନା କରିଛନ୍ତି ।
