ଭୁବନେଶ୍ୱର(ଏଟିଆର ବ୍ୟୁରୋ): କଟକଣା ସହ ରାଜଧାନୀ ଭୁବନେଶ୍ୱରରେ ଆଜି ସକାଳେ କିଛି ପାର୍କ ଖୋଲା ଯାଇଛି । ସକାଳ ୭ଟାରୁ ୧୦ଟା ପର୍ଯ୍ୟନ୍ତ ପରୀକ୍ଷା ମୂଳକ ଭାବେ ଏହା ଖୋଲା ଯାଇଥିଲା । ପୁଣି ଆଜି ଅପରାହ୍ନ ୪ଟରୁ ୬ଟା ପର୍ଯ୍ୟନ୍ତ ଖୋଲା ଯିବ ପାର୍କ । ରାଜଧାନୀ ଭୁବନେଶ୍ୱରରେ ଥିବା ଫରେଷ୍ଟ ପାର୍କ, ଆଇଜି ପାର୍କ ଓ ବୁଦ୍ଧ ପାର୍କକୁ ସକାଳ ଖୋଲା ଯାଇଥିଲା । ବିଏମସି ପକ୍ଷରୁ ପରୀକ୍ଷା ମୂଳକ ଭାବେ ଏହି ପାର୍କ ଗୁଡିକ ଖୋଲା ଯାଇଥିଲା । ତେବେ ପାର୍କ ଖୋଲା ଯାଇଥିଲେ ମଧ୍ୟ କିଛି କଟକଣା ଜାରି କରାଯାଇଥିଲା ।
ପାର୍କକୁ ବୁଲିବା ପାଇଁ ଯାଉଥିବା ଲୋକ ମାନଙ୍କ ପାଇଁ ମାସ୍କ ପିନ୍ଧିବା ସହ ସାମାଜିକ ଦୂରତା ବଜାଇ ରଖିବା ବଧ୍ୟତାମୂଳକ କରାଯାଇଛି । ଏହା ସହ ପାର୍କରେ ଥିବା ବ୍ୟାୟାମ ଉପକରର ବ୍ୟବହାର ନ କରିବା ଓ ପାର୍କ ଭିତରେ ଛେପ ପକାଇବାକୁ ବାରଣ କରାଯାଇଛି । ସୂଚନା ଯୋଗ୍ୟ କରୋନା ମହାମାରୀ ରାଜ୍ୟରେ ଆରମ୍ଭ ହେବା ଦିନ ଠାରୁ ରାଜ୍ୟ ସରକାରଙ୍କ ପକ୍ଷରୁ ଜନଗହଳିପୂର୍ଣ୍ଣ ଜାଗା ଗୁଡିକ ବନ୍ଦ କରାଯାଇଥିଲା । ତେବେ ପ୍ରାୟ ୨ ମାସରୁ ଅଧିକ ଦିନ ହେବ ପାର୍କ ବନ୍ଦ ହୋଇ ରହିଥିଲା ।
