ପୁରୀ (ଏଟିଆର ବ୍ୟୁରୋ) ; ମାତିଛନ୍ତି ଚୋର । ଧନ ସମ୍ପତି ପରେ ଏବେ ପଡି ଯାଇଛନ୍ତି ଟ୍ରେନର ବ୍ୟାଟେରୀ ଚୋରି କରିବାକୁ । କିନ୍ତୁ ଚୋରୀ କରିବା ପରେ ଚାଲାଖ କରି ବ୍ୟାଟେରୀ ଗୁଡିକ ନେଇ ପୋଖରୀରେ ଲୁଚେଇ ରଖୁଛନ୍ତି । ଏଭଳି ଏକ ଅଭାବନୀୟ ଘଟଣା ଦେଖିବାକୁ ମିଳିଛି ପୁରୀ ଜିଲ୍ଲା ଦୁର୍ଗାଦାଶପୁର ବଧି ଗାଁରେ । ପୋଖରୀକୁ ନିରାପଦ ସ୍ଥାନ ମନେ କରି ଲୁଚେଇ ରଖିଥିବା ବ୍ୟାଟେରୀର ସନ୍ଧାନ ପାଇବା ପରେ ରେଳବାଇ ପୋଲିସ ଘଟଣାସ୍ଥଳରେ ପହଞ୍ଚି ୩ଟି ଅଖାରେ ବନ୍ଧା ହୋଇଥିବା ବ୍ୟାଟେରୀକୁ ଜବତ କରିଛି । ତେବେ ପୋଖରୀରୁ ବ୍ୟାଟେରୀ ଉଦ୍ଧାର କରିବା ପାଇଁ ଅଗ୍ନିଶମ ବିଭାଗର କର୍ମଚାରୀ ମାନେ ସହଯୋଗ କରିଛନ୍ତି ।
ମିଳିଥିବା ସୂଚନା ମୁତାବକ ଚୋରମାନେ ଖୋର୍ଦ୍ଧାରୋଡରେ ଚାଲୁଥବା ସାପ୍ତହିକ ଟ୍ରେନ ଗୁଡିକରୁ ଏହି ବ୍ୟାଟେରୀ ଚୋରୀ କରି ପୁରୀ ଜିଲ୍ଲାର ବିଭିନ୍ନ ବଜାରରେ ଏହି ବ୍ୟାଟେରୀ ଗୁଡିକ ବିକ୍ରି କରିଥାନ୍ତି । ଛୋଟ ଛୋଟ ଷ୍ଟେସନରେ ସୁରକ୍ଷା ବ୍ୟବସ୍ଥା ନଥିବାରୁ ଏହାର ଫାଇଦା ଉଠାଇ ଚୋରୀ କରିଥାନ୍ତି । ତେବେ ଆଜି ରେଳବାଇ ପୋଲିସ ଏହି ଖବର ପାଇବା ପରେ ଜଣକୁ ଗିରଫ କରିଛି । ଏ ଘଟଣାରେ ଅଧିକ ତଥ୍ୟ ପାଇଁ ରେଳବାଇ ପୋଲିସ ଏବଂ ରେଳବାଇ କ୍ରାଇମବ୍ରାଞ୍ଚ ତଦନ୍ତ ଜାରୀ ରଖିଛି ।
