ଖୋର୍ଦ୍ଧା( ଏଟିଆର ବ୍ୟୁରୋ): ଜଣେ ଯୁବକକୁ ୨ ଜଣ ଯୁବକ ଗଛରେ ବାନ୍ଧି ସମସ୍ତଙ୍କ ଆଗରେ ନିର୍ଦ୍ଧୁମ ମାରିବା ସହିତ ପରିସ୍ରା ପିଆଇଛନ୍ତି । ଏମିତି ଏକ ଅଭାବନୀୟ ଘଟଣା ଦେଖିବାକୁ ମିଳିଛି ଖୋର୍ଦ୍ଧା ସଦର କାଇପଦ ଠାରେ ।ସୂଚନା ଅନୁସାରେ ଗତ କିଛିଦିନ ତଳେ କୌଣସି ଏକ ଘଟଣାକୁ ନେଇ କାଇପଦ ଓ ବଙ୍ଗିରା ଗ୍ରାମର ଯୁବକଙ୍କ ମଧ୍ୟରେ ବିବାଦ ଲାଗି ରହିଥିଲା । ତେବେ ଗତ ୧୮ ତାରିଖରେ କାଇପଦର ୨ ଯୁବକ କୌଣସି ପ୍ରକାରେ ପୀଡିତ ଯୁବକକୁ ପାଇବା ପରେ ନିଜ ଗ୍ରାମରେ ଥିବା ଏକ ନଡିଆ ଗଛରେ ବାନ୍ଧି ଦେଇଥିଲେ ।
ପରେ ଯୁବକକୁ ନିର୍ଦ୍ଧୁମ ପିଟିବା ସହିତ ତାକୁ ପରିସ୍ରା ପିଆଇଥିଲେ । ଯୁବକଟି ଯେତେ କାକୁତି ମିନତୀ ହୋଇଥିଲେ ମଧ୍ୟ ଉପସ୍ଥିତ ଲୋକେ ଏହାକୁ ବିରୋଧ କରିନଥିଲେ କି ଯୁବକକୁ ଉଦ୍ଧାର କରିନଥିଲେ । ତେବେ ଏହି ଘଟଣାର ଭିଡିଓ ଏବେ ଶୋସାଲ ମିଡିଆରେ ଭାଇରାଲ ହେବା ପରେ ଘଟଣାକୁ ନେଇ ଚର୍ଚ୍ଚା ଜୋର ଧରିଛି । ସବୁ ମହଲରୁ ଏଭଳି କାଣ୍ଡକୁ ନିନ୍ଦା କରାଯିବା ସହିତ ଅଭିଯୁକ୍ତ ୨ ଯୁବକଙ୍କୁ ଦଣ୍ଡ ଦେବାକୁ ଦାବି ହେଉଛି ।
