ଭୁବନେଶ୍ୱର (ଏଟିଆର ବ୍ୟୁରୋ); ଯାଜପୁର ନିର୍ବାଚନ ମଣ୍ଡଳୀରେ ପୁଣିଥରେ ବିଜୟ ହୋଇଛନ୍ତି ରାଜ୍ୟ ରାଜନୀତିର ଚର୍ଚ୍ଚିତ ଚେହେରା ପ୍ରଣବ ପ୍ରକାଶ ଦାଶ । ଏହି ବିଜୟ ତାଙ୍କର ହ୍ୟାଟ୍ରିକ ବିଜୟ । ଏଠାରେ ବିରୋଧୀମାନେ ଦୃଢ଼ ରଣନୀତି ପ୍ରସ୍ତୁତ କରିଥିଲେ ସୁଦ୍ଧା ବବିଙ୍କ ବିଜୟରେ ରୋକ ଲଗାଇ ପାରି ନାହାଁନ୍ତି । ତେବେ ଯାଜପୁର ଲୋକସଭା ଅଧିନରେ ଥିବା ୭ଟି ଯାକ ଆସନରେ ବିଜେଡି ମଧ୍ୟ କ୍ଳିନସ୍ୱିପ କରିଛି । ଲୋକସଭା ଆସନରେ ଶର୍ମିଠା ସେଠୀ ମଧ୍ୟ ବିଜୟ ହୋଇଛନ୍ତି ।
ବିଜେଡିର ପାୱାର କରିଡର ମଧ୍ୟରେ ବବିଙ୍କ ନାମ ଉପରେ ରହିଛି । ଏଣୁ ଏହି ନିର୍ବାଚନ ମଣ୍ଡଳୀ ଉପରେ ରହିଥିଲା ସମସ୍ତଙ୍କ ନଜର । ବବିଙ୍କ ହ୍ୟାଟ୍ରିକରେ ରୋକ ଲଗାଇବା ପାଇଁ ବିରୋଧୀମାନେ ନୂଆ ଗେମପ୍ଳାନ କରିଥିଲେ । କିନ୍ତୁ ନବୀନଙ୍କ ଲହର ଏବଂ ବବିଙ୍କ ଲୋକ ପ୍ରିୟତା ଆଗରେ ସବୁକିଛି ଫେଲ ମାରିଥିଲା । ବବି ଏକ ବଡ ବିଜୟ ହାସଲ କରିଛନ୍ତି ।
ଏଠାରେ ବିଜେପି ପକ୍ଷରୁ ଗୌତମ ରାୟ ପ୍ରାର୍ଥୀ ହୋଇଥିବା ବେଳେ କଂଗ୍ରେସ ସନ୍ତୋଷ କୁମାର ନନ୍ଦଙ୍କୁ ମଇଦାନକୁ ପଠାଇଥିଲା । କିନ୍ତୁ ଉଭୟ ନବୀନଙ୍କ ସିପାହୀ ବବିଙ୍କ ଆଗରେ ଚିତ ପଟାଙ୍ଗ ମାରିଥିଲେ । ବବି ବଡ ବ୍ୟବଧାନରେ ବିଜୟ ହୋଇଥିଲେ । ସେ ୬୦.୨୪ ଶତକଡା ଜନମତ ହାତେଇଥିବା ବେଳେ ବିଜେପି ମାତ୍ର ୩୫.୬୮ ପ୍ରତିଶତ ଜନମତ ଯାଇଛି । ବିଜେପି ଏବଂ ବିଜେଡି ଲଢ଼େଇରେ ପଛରେ ପଡି ରହିଥିଲା କଂଗ୍ରେସ । କଂଗ୍ରେସ ମାତ୍ର ୨.୮୭ ପ୍ରତିଶତ ଜନମତ ମିଳିଛି ।
