ଲଣ୍ଡନ (ଏଟିଆର ବ୍ୟୁରୋ); ସବୁ ଅପେକ୍ଷାର ଅନ୍ତ । ଆଜିଠାରୁ ଆରମ୍ଭ ହେବାକୁ ଯାଉଛି କ୍ରିକେଟ ବିଶ୍ୱକପ । ୧୦ ଦେଶକୁ ନେଇ ଆରମ୍ଭ ହେବାକୁ ଯାଉଛି କ୍ରିକେଟ ମହାକୁମ୍ଭ । ଆଜି ଉଦଘାଟନ ମ୍ୟାଚରେ ଆୟୋଜକ ଇଂଲଣ୍ଡ ଏବଂ ଦକ୍ଷିଣ ଆଫ୍ରିକା ମଧ୍ୟରେ ହେବାକୁ ଯାଉଛି । ଭାରତୀୟ ସମୟ ୩ଟା ବେଳେ ଆରମ୍ଭ ହେବ ମ୍ୟାଚ । ଦୁଇ ଦେଶ ଭଲ ଫର୍ମରେ ଥିବାରୁ ମ୍ୟାଚଟି ରୋମାଞ୍ଚକ ହେବ ବୋଲି ଆଶା କରାଯାଉଛି ।
ଇଂଲଣ୍ଡ ଏବଂ ଦକ୍ଷିଣ ଆଫ୍ରିକା ଥରେ ହେଲେ ମଧ୍ୟ ବିଶ୍ୱକପ ହାତେଇ ନାହାଁନ୍ତି । ଏଣୁ ଉଭୟ ଦଳ ପ୍ରଥମରୁ ବିଜୟ ଅଭିଯାନ ଆରମ୍ଭ କରିବା ପାଇଁ ଚେଷ୍ଟା କରିବେ । ୨୦୧୫ ବିଶ୍ୱକପରେ ଦକ୍ଷିଣ ଆଫ୍ରିକା ସେମିଫାଇନାଲରେ କଟିଥିବା ବେଳେ ଇଂଲଣ୍ଡ ଲିଗରୁ କଟିଯାଇଥିଲା । ଚଳିତ ବର୍ଷ ଘରୋଇ ପରିବେଶରେ ଦଳ ଖେଳିବାକୁ ଯାଉଥିବାରୁ ଇଂଲଣ୍ଡ ବିଶ୍ୱକପ ଟାଇଟଲ ହାତେଇବାର ପ୍ରଥମ ହକଦାର ରହିଛି ।
ବୁଧବାର ବିଶ୍ୱକପ ଉଦଘାଟନୀ ଉତ୍ସବ ପାଳିତ ହୋଇଛି । ୧୦ ଦେଶର ଅଧିନାୟକ ଇଂଲଣ୍ଡ ରାଣୀ ଏଲିଜାବେଥ୍ ଙ୍କ ସହ ଫଟୋ ଉଠାଇଥିଲେ । ଉଦଘାଟନୀ ଅବସରରେ ପ୍ରତ୍ୟେକ ଦେଶରୁ ୨-୨ ଜଣ ଲୋକ ଔପଚାରିକ ଭାବେ ପ୍ରତିନିଧିତ୍ୱ କରିଥିଲେ । ଭାରତ ପକ୍ଷରୁ ପୂର୍ବତନ ଅଧିନାୟକ ଏବଂ କୋଚ୍ ଅନିଲ କୁମ୍ବଲେ ଓ ଅଭିନେତା ଫରହାନ ଅଖତର, ପାକିସ୍ତାନ ତରଫରୁ ମଲାଲା ୟୁସୁଫଜଇ ଏବଂ ଅଜହର, ୱେଷ୍ଟଇଣ୍ଡିଜ ତରଫରୁ ବିବିଆନ ରିଚାର୍ଡ ଓ ଧାବକ ୟୋହନ ବ୍ଲେକ, ଦକ୍ଷିଣ ଆଫ୍ରିକାରୁ ଜ୍ୟାକ କାଲିସ, ଅଷ୍ଟ୍ରେଲିଆରୁ ବ୍ରେଟ ଲି ଓ ଆୟୋଜକ ପକ୍ଷରୁ କେଭିନ ପିଟରସନ ମଧ୍ୟ ଉପସ୍ଥିତ ଥିଲେ ।
