ମୁମ୍ବାଇ (ଏଟିଆର ବ୍ୟୁରୋ): ଟେଲିଭିଜନର ଜଣାଶୁଣା ଅଭିନେତା ଆଶିଷ ରୟଙ୍କର ଆଜି ପରଲୋକ ଘଟିଛି । କିଡନୀ ଫେଲ ହେବା ଯୋଗୁଁ ତାଙ୍କର ମୃତ୍ୟୁ ହୋଇଛି । ମୃତ୍ୟୁ ବେଳକୁ ତାଙ୍କୁ ୫୫ ବର୍ଷ ବୟସ ହୋଇଥିଲା । ସେ ଦୀର୍ଘ ଦିନ ହେବ ରୋଗରେ ପୀଡିତ ଥିଲେ ।
ଆଜି ସେ ତାଙ୍କ ବାସ ଭବନରେ ଶେଷ ନିଶ୍ୱାଷ ତ୍ୟାଗ କରିଛନ୍ତି । ସିଣ୍ଟାର ସିନିୟର ଜଏଣ୍ଟ ସେକ୍ରେଟାରୀ ଅମିତ୍ ବହଲ ଏହି ଦୁଃଖ ଖବର ଦେଇ କହିଛନ୍ତି କି , ଆଶିଷ ରୟଙ୍କର ତାଙ୍କ ଘରେ ପରଲୋକ ଘଟିଛି । ଏନେଇ ନିର୍ଦ୍ଦେଶକ ଅରବିନ୍ଦ ବବ୍ୱଲ ଫୋନ କରି ମୋତେ ଜଣାଇଥିଲେ ।
ଆଶିଷ ଦୀର୍ଘ ଦିନ ହେବ କିଡନୀ ରୋଗ ସହ ଲଢୁଥିଲେ । ଆର୍ଥିକ ସ୍ଥିତି ସ୍ୱଚ୍ଛଳ ନଥିବାରୁ ଚିକିତ୍ସା ପାଇଁ ସେ ଫେସବୁକ୍ ଜରିଆରେ ଆର୍ଥିକ ସହାୟତା ମାଗିଥିଲେ । କିନ୍ତୁ ଏବେ ସେ ସମସ୍ତଙ୍କୁ ଛାଡି ଆରପାରିକୁ ଚାଲି ଯାଇଛନ୍ତି । ସେପଟେ ତାଙ୍କ ମୃତ୍ୟୁ ଖବର ଆସିବା ପରେ ଟେଲିଭିଜନ ଇଣ୍ଡଷ୍ଟ୍ରୀରେ ଶୋକର ଛାୟା ଖେଳିଯାଇଛି ।
ସୂଚନାଯୋଗ୍ୟ, ସେ ‘ଶଶୁରାଲ ସିମର କା’, ‘ବନେଗି ଆପନି ବାତ୍’, ‘ବା ବୋହୂ ଔର ବେବି’, ‘ମେରୀ ଅଙ୍ଗନେ ମେଁ’ ଏବଂ ‘କୁଛ୍ ରଙ୍ଗ ପ୍ୟାର କେ ଏସେ ଭି’ ସହିତ ଅନେକ ସିରିଏଲରେ ଅଭିନୟ କରିଛନ୍ତି । ଏହାସହିତ ସେ ଜଣେ ଡବିଙ୍ଗ ଆଟିଷ୍ଟ୍ ମଧ୍ୟ ଥିଲେ । ସେ ଅନେକ ହଲିଉଡ ଫିଲ୍ମରେ ନିଜର ସ୍ୱର ଦେଇଛନ୍ତି ।
