ମୁମ୍ବାଇ(ଏଟିଆର ବ୍ୟୁରୋ):ଅଭିନେତା ସୁଶାନ୍ତ ସିଂ ରାଜପୁତଙ୍କ ମୃତ୍ୟୁ ମାମଲାରେ ଡ୍ରଗ୍ସ ଲିଙ୍କ୍ ପାଇଁ ରିୟାଙ୍କୁ ହାଜତ ନିଆଯାଇଥିଲା । ତେବେ ବେଲ ପାଇଁ ତାଙ୍କ ଓକିଲ ସେସନ କୋର୍ଟରେ ଆବେଦନ କରିଥିଲେ ହେଲେ ସେସନ କୋର୍ଟ ରିୟା ଚକ୍ରବର୍ତ୍ତୀ ଓ ଷୌଭିକ ଚକ୍ରବର୍ତ୍ତୀଙ୍କ ଜାମିନ ଆବେଦନ ଖାରଜ କରିଛନ୍ତି । ମୁମ୍ବାଇ ସେସନ କୋର୍ଟ ରିୟା ଓ ଷୌଭିକ ଚକ୍ରବର୍ତ୍ତୀଙ୍କ ସମେତ ସମସ୍ତ ୬ ଅଭିଯୁକ୍ତଙ୍କ ଜାମିନ ଆବେଦନ ଖାରଜ କରିଛନ୍ତି । ବର୍ତ୍ତମାନ ରିୟାଙ୍କୁ ଜେଲରେ ରହିବାକୁ ହେବ । ଏନସିବିକୁ ଦେଇଥିବା ବୟାନରେ ଷୌଭିକ କହିଥିଲେ ଯେ ସେ ସୁଶାନ୍ତଙ୍କ ପାଇଁ ଅନେକଥର ଡ୍ରଗ୍ସ ଆଣିଥିଲେ । ତେବେ ଡ୍ରଗ୍ସର ପେମେଣ୍ଟ ତାଙ୍କ ଭଉଣୀ କରୁଥିଲେ ବୋଲି ସେ ବୟାନ ଦେଇଥିଲେ । ରିୟା ସୁଶାନ୍ତଙ୍କ କ୍ରେଡିଟ କାର୍ଡରୁ ପେମେଣ୍ଟ କରୁଥିଲେ ବୋଲି ଷୌଭିକ କହିଥିଲେ ।
ରିୟାଙ୍କ ସହ ଷୌଭିକ, ସାମୁଏଲ ମୀରାଣ୍ଡା, ଦିପେସ ସାୱନ୍ତ, ଜୌଦ ବିଲାତ୍ରା ଓ ଅବଦୁଲ ବାସିତ ପରିହାରଙ୍କୁ ମଧ୍ୟ ଜାମିନ ମିଳିନାହିଁ । ମୁମ୍ବାଇ ସେସନ କୋର୍ଟ ସମସ୍ତ ୬ଜଣଙ୍କ ଜାମିନ ଆବେଦନ ଖାରଜ କରିଛନ୍ତି । ତେବେ ଆଗାମୀ ସପ୍ତାହରେ ବମ୍ବେ ହାଇ କୋର୍ଟରେ ରିୟା ଓ ତାଙ୍କ ଭାଇ ସୌଭିକଙ୍କ ବେଲ ପାଇଁ ଆବେଦନ କରିବେ ବୋଲି କହିଛନ୍ତି ରିୟାଙ୍କ ଓକିଲ ।
