ନୂଆଦିଲ୍ଲୀ (ଏଟିଆର ବ୍ୟୁରୋ ) ; ଠଗସ୍ ଅଫ ହିନ୍ଦୋସ୍ତାନ ଫିଲ୍ମକୁ ନେଇ ମୁହଁ ଖୋଲିଛନ୍ତି ଅଭିନେତା ଅମୀର ଖାନ । ଏବେ ଏବେ ରିଲିଜ ହୋଇଥିବା ଅମୀର ଖାନ ଓ ଅମିତାଭ ବଚନଙ୍କ ଅଭିନିତ ଫିଲ୍ମ ଠଗସ୍ ଅଫ ହିନ୍ଦୋସ୍ତାନକୁ ନେଇ ସମାଲୋଚନା କରିଛନ୍ତି ଦର୍ଶକ । ଏମିତିକି ଏଇ ଫିଲ୍ମକୁ ନେଇ ଏବେ ଲଗାଦାର ଜୋକ୍ସ ଓ ମିମ୍ସ ଦେଖିବାକୁ ମିଳୁଛି । ତେବେ ଏନେଇ ଅଭିନେତା ଅମୀର ଖାନ ନିଜ ମତ ରଖିଛନ୍ତି ।
ଠଗସ୍ ଅଫ ହିନ୍ଦୋସ୍ତାନ ସଫଳ ହେଉ କି ବିଫଳ ହେଉ ସେ ସନ୍ତୁଷ୍ଠ ରହିବେ ବୋଲି ଅମୀର ଖାନ ଜଣାଇଛନ୍ତି । ଫିଲ୍ମଟିକୁ ଭଲ କରିବା ପାଇଁ ସମସ୍ତ ଅଭିନେତା ନିଜ ନିଜ ସର୍ବଶ୍ରେଷ୍ଠ ଦେଇଥିବା ବେଳେ ନିଜ ଭଲ ପାଇବା ଓ ପ୍ରୟାସରେ ଏହି ଫିଲ୍ମଟି ନିର୍ମାଣ ହୋଇପାରିଥିବା ସେ କହିଛନ୍ତି ।
ଖାଲି ସେତିକି ନୁହେଁ ଫିଲ୍ମଟି ଏକ ଯାତ୍ରା ଥିଲା ଓ ଏହା ତାଙ୍କ ପାଇଁ ସ୍ମରଣୀୟ ହୋଇ ରହିବ ବୋଲି ଅମୀର ଖାନ କହିଛନ୍ତି । ଏହି ଅବସରରେ ଅମୀର ସ୍ପଷ୍ଟ କରିଛନ୍ତି ଯେ , ଆମେ ଏହି ଫିଲ୍ମ ପାଇଁ ଶତ ପ୍ରତିଶତ ସର୍ବଶ୍ରେଷ୍ଠ ଦେଇଛୁ । ଫିଲ୍ମଟି ସଫଳ ହେବ କି ନାହିଁ ମୁଁ ଜାଣେନି ତଥାପି ଏହି ୨ ବର୍ଷ ମୋ ପାଇଁ ସ୍ମରଣୀୟ ହୋଇ ରହିବ ।
ସୂଚନାଯୋଗ୍ୟ , ୟଶ ରାଜ ଫିଲ୍ମ ବ୍ୟାନରରେ ପ୍ରସ୍ତୁତ ବିଜୟ କୃଷ୍ଣ ଆଚାର୍ଯ୍ୟଙ୍କ ଦ୍ୱାରା ନିର୍ଦ୍ଦେଶିତ ଠଗସ୍ ଅଫ ହିନ୍ଦୋସ୍ତାନ ଫିଲ୍ମକୁ ନେଇ ବିଭିନ୍ନ ମହଲରୁ ସମାଲୋଚନାର ସୁଅ ଛୁଟିବାରେ ଲାଗିଛି । ଏହି ଫିଲ୍ମରେ ବିଗ ବି ଅମିତାଭ ବଚନଙ୍କ ସମେତ ଅମୀର ଖାନ , କ୍ୟାଟ୍ରିନା କୈଫ , ଫାତିମା ଶେଖ ଅଭିନୟ କରିଛନ୍ତି । ଏହି ଫିଲ୍ମର କାହାଣୀ , ଗ୍ରାଫିକ୍ସ ଓ ସ୍କ୍ରିନ ପ୍ଲେକୁ ଲୋକେ ନାପସନ୍ଦ କରିଥିବାର ଦେଖାଦେଇଛି ।
