ଭୁବନେଶ୍ୱର,(ଏଟିଆର ବ୍ୟୁରୋ): ହାତରେ ସାଲାଇନ ଲାଗିଛି । ମେଡିକାଲ ବେଡରେ ପଡିଛନ୍ତି ଛାତ୍ରୀ । ତେବେ ତାଙ୍କ ଅବସ୍ଥା ଏଭଳି କେମିତି ହେଲା ତାହା ଜଣାପଡିନଥିବା ବେଳେ ପରିବାର ଲୋକଙ୍କ ଅଭିଯୋଗ ଝିଅକୁ ଅପହରଣ କରାଯାଇଥିଲା । ଶୁକ୍ରବାର ସକାଳୁ ନିଖୋଜ ଥିବା ଝିଅକୁ ନେଇ ପରିବାର ଲୋକେ ଥାନାରେ ମଧ୍ୟ ଅଭିଯୋଗ କରିଥିଲେ । ତେବେ ଗତକାଲି ରାତିରେ ଅଖା ଭିତରେ ହାତଗୋଡ ବନ୍ଧାଯାଇ ଛାତ୍ରୀଙ୍କୁ ବାଡି ପଟେ କେହି ଫିଙ୍ଗି ଦେଇଯାଇଥିଲେ । ପରିବାର ଲୋକେ ଏହା ଦେଖିବା ପରେ ଛାତ୍ରୀଙ୍କୁ ଉଦ୍ଧାର କରି ହସପିଟାଲରେ ଭର୍ତ୍ତି କରିଛନ୍ତି । ଏଭଳି ଏକ ଲୋମାଟାଙ୍କୁରା ଘଟଣା ଘଟିଛି ଭଦ୍ରକ ତିହିଡି ଥାନା ଗଣ୍ଡପଡା ଗାଁରେ । ୨ଜଣ ଯୁବକ ଝିଅକୁ ଅପହରଣ କରିନେଇଥିବା ଅଭିଯୋଗ ହୋଇଥିବା ବେଳେ ପୁଲିସ ଏବେ ଜଣଙ୍କୁ ଅଟକ ରଖି ପଚରାଉଚରା କରୁଛି । ରିପୋର୍ଟ ଅନୁସାରେ, ୧୬ବର୍ଷର ଏହି ନାବାଳିକା ଝିଅଟି ଘରେ ଥିବା ବେଳେ ଅଚାନକ ୨ଜଣ ଯୁବକ ଏକ ବାଇକରେ ତାକୁ ଟେକି ନେଇଥିଲେ । ପରିବାର ଲୋକେ ଏନେଇ ଅଭିଯୋଗ କରିଥିଲେ ମଧ୍ୟ ପୁଲିସ ତ୍ୱରିତ ପଦକ୍ଷେପ ନେଇନଥିବା ଅଭିଯୋଗ ହୋଇଛି । ତେବେ ରାତି ୮ଟା ବେଳକୁ ନାବାଳିକା ଜଣଙ୍କ ଘର ପଛ ପାଖ ବିଲରେ ଗୋଡ ହାତ ବନ୍ଧା ହୋଇ ପଡି ରହିଥିବା ଦେଖିବାକୁ ମିଳିଥିଲା । ନାବାଳିକାର ଦେହରେ ଅନେକ କ୍ଷତ ଚିହ୍ନ ରହିଛି ।
