ବାଲେଶ୍ୱର (ଏଟିଆର ବ୍ୟୁରୋ): ରାତି ଅଧରେ ଭଦ୍ରଲୋକ ଭଳି ଆସି କବାଟ ଠକ୍ ଠକ୍ କଲେ । କବାଟ ଖୋଲିଲା ବେଳକୁ ମୁଣ୍ଡରେ ବନ୍ଧୁକ ଲଗାଇ ଘର ଭିତରେ ପଶିଲେ ଦୁର୍ବୃତ୍ତ । ତାପରେ ଆରମ୍ଭ ହେଲା ଲୁଟ୍ । ସୁନାଗହଣା ଠାରୁ ଆରମ୍ଭ କରି ଟଙ୍କା ଗାଡି ଆଦି ସବୁ କିଛି ଲୁଟିନେଲେ । ଏଭଳି ଏକ ଘଟଣା ନଜରକୁ ଆସିଛି ବାଲେଶ୍ୱର ଜିଲ୍ଲା ରେମୁଣା ରାଉତପୁର ଗାଁରେ ।
ଗତକାଲି ଶିତୁଆ ରାତିରେ ଦୃର୍ବୃତ୍ତମାନେ ଏଭଳି କାଣ୍ଡ ଭିଆଇଛନ୍ତି । ଅଚାନକ୍ ଚାରୀଜଣ ବ୍ୟକ୍ତି ଆସି ରାଉତପୁର ଗାଁର ସୁଶାନ୍ତ ମହାର୍ଣ୍ଣାଙ୍କ ଘର କବାଟ ବାଡେଇ ଥିଲେ । ସୁଶାନ୍ତ କବାଟ ଖୋଲିଲା ବେଳକୁ ସେମାନଙ୍କ ମଧ୍ୟରୁ ତିନି ଜଣ ବ୍ୟକ୍ତି ତାଙ୍କ ମୁଣ୍ଡରେ ବନ୍ଧୁକ ଦେଖାଇ ଘର ଭିତରେ ପଶିଯାଇଥିଲେ । ତାପରେ ତାଙ୍କ ଘରୁ ୨୦ ଭରି ସୁନା, ନଗଦ ୩୦ ହଜାର ଟଙ୍କା ଏବଂ ଗୋଟେ ବାଇକ୍ ଲୁଟି ନେଇଥିଲେ । ଏନେଇ ସୁଶାନ୍ତ ଥାନାରେ ଅଭିଯୋଗ କରିବାରୁ ପୋଲିସ ଘଟଣାରେ ପହଁଚି ତଦନ୍ତ ଆରମ୍ଭ କରିଛି ।
