ଭୁବନେଶ୍ୱର (ଏଟିଆର ବ୍ୟୁରୋ): ଚଳିତବର୍ଷ ରାଷ୍ଟ୍ରୀୟ ଶିକ୍ଷକ ପୁରସ୍କାର ପାଇବେ ୪୭ଜଣ ଶିକ୍ଷକ । ଆଜି ଏନେଇ କେନ୍ଦ୍ରୀୟ ଶିକ୍ଷା ମନ୍ତ୍ରାଳୟ ପକ୍ଷରୁ ବିଦ୍ଧ ଘୋଷଣା କରାଯାଇଛି । ପୁରସ୍କାର ପାଇବାକୁ ଥିବା ୪୭ଜଣ ଶିକ୍ଷକଙ୍କ ମଧ୍ୟରୁ ୨ଜଣ ଓଡିଶାର ଅଟନ୍ତି । ସେହି ଦୁଇ ଶିକ୍ଷକ ହେଲେ ବୌଦ୍ଧ ଜିଲ୍ଲାର ବସନ୍ତ କୁମାର ସାହୁ ଏବଂ ଖୋର୍ଦ୍ଧା ଜିଲ୍ଲାର ତାପସ କୁମାର ମହାନ୍ତି ।
ବସନ୍ତ କୁମାର ସାହୁ ହାଡଭଙ୍ଗାର ସରସରାସ୍ଥିତ ସରକାରୀ ଉଚ୍ଚ ପ୍ରାଥମିକ ବିଦ୍ୟାଳୟର ପ୍ରଧାନ ଶିକ୍ଷକ ଥିବା ବେଳେ ତାପସ କୁମାର ମହାନ୍ତ ଭୁବନେଶ୍ୱର ମ୍ୟୁନିସିପାଲିଟି କର୍ପୋରେସନ୍ ଅଧୀନରେ ଭୀମଭୋଇ ଦୃଷ୍ଟିହୀନ ବିଦ୍ୟାଳୟର ଶିକ୍ଷକତା କରୁଛନ୍ତି । ଓଡିଶା ପକ୍ଷରୁ ଦାଖଲ ହୋଇଥିବା ନାମାଙ୍କନ ମଧ୍ୟରୁ ଏହି ଦୁଇ ଶିକ୍ଷକଙ୍କୁ ମନୋନିତ କରାଯାଇଛି ।
ମନ୍ତ୍ରଣାଳୟ ଦ୍ବାରା ଜାରି ହୋଇଥିବା ଏକ ସର୍କୁଲାର ଅନୁଯାୟୀ, ୨୦୨୦ ବିଦ୍ୟାଳୟ ଶିକ୍ଷା ଏବଂ ସାକ୍ଷରତା ବିଭାଗରେ ପୁରସ୍କାର ବିଜେତାଙ୍କୁ ଚୟନ କରିବାକୁ ଜାତୀୟସ୍ତରରେ ଏକ ଦଳ ଗଠନ ହୋଇଛି । ଅନ୍ୟପଟେ ଗତ ବର୍ଷ କୋରାପୁଟ ଜିଲ୍ଲାର ଜଣେ ଶିକ୍ଷକ ପବିତ୍ର ମୋହନ ଦାଶ ବିଜ୍ଞାନ ଶିକ୍ଷା ପାଇଁ ରାଷ୍ଟ୍ରୀଯ ପୁରସ୍କାର ପାଇଥିଲେ।
