ମୟୁରଭଞ୍ଜ (ଏଟିଆର ବ୍ୟୁରୋ ) ; ବୃଦ୍ଧ ଦମ୍ପତିଙ୍କୁ ନିର୍ମମ ହତ୍ୟା । ରହସ୍ୟ ଘେରରେ ବୃଦ୍ଧ ଦମ୍ପତିଙ୍କ ହତ୍ୟା । ଘରେ ବୃଦ୍ଧ ଦମ୍ପତି ଏକାକୀ ଥିବା ବେଳେ ହତ୍ୟା କଲେ ଦୁର୍ବୃତ । ମୟୁରଭଞ୍ଜ ଜିଲ୍ଲା ବାରିପଦା ସଦର ଥାନା ଅନ୍ତର୍ଗତ କୁକୁଡାଯୋଡି ଗ୍ରାମରେ ଘଟିଛି ଏଭଳି ଅଭାବନୀୟ ହତ୍ୟାକାଣ୍ଡ । ଯାହା ସ୍ଥାନୀୟ ଅଞ୍ଚଳରେ ଚାଞ୍ଚଲ୍ୟ ଖେଳାଇ ଦେଇଛି । ମୃତ ବୃଦ୍ଧ ଦମ୍ପତିଙ୍କ ନାମ ପୁର୍ଣ୍ଣ ହେମ୍ବ୍ରମ ଓ ତାଙ୍କ ପତ୍ନୀ ହଂସ ହେମ୍ବ୍ରମ ବୋଲି ଜଣାପଡିଛି । ସୂଚନା ଅନୁସାରେ , କୁକୁଡାଯୋଡି ଗ୍ରାମବାସୀ ମାନେ ଆଜି ସକାଳ ସମୟରେ ଦୁଇଟି ମୃତ ଦେହ ପଡିଥିବାର ଦେଖିଥିଲେ । ସେମାନଙ୍କ ମଧ୍ୟରୁ ପୁର୍ଣ୍ଣଙ୍କ ମୃତଦେହ ଘର ବାହାର ରାସ୍ତା ଉପରେ ପଡିଥିବା ବେଳେ ତାଙ୍କ ପତ୍ନୀଙ୍କ ମୃତଦେହ ଘର ଭିତରେ ପଡିଥିଲା । ଗ୍ରାମବାସୀ ମାନେ ଏ ସବୁକୁ ଦେଖି ପୋଲିସକୁ ଖବର ଦେଇଥିଲେ । ତେବେ ପୋଲିସ ଘଟଣା ସ୍ଥଳେ ପହଞ୍ଚି ଶବ ଦୁଇଟିକୁ ବ୍ୟବଛେଦ ପାଇଁ ଡାକ୍ତରଖାନା ପଠାଇବା ସହ ହତ୍ୟାକାଣ୍ଡର ରହସ୍ୟ ଖୋଜିବା ଆରମ୍ଭ କରିଛି ।
ସେପଟେ ହତ୍ୟାର କାରଣ ଅସ୍ପଷ୍ଟ ରହିଥିବା ବେଳେ ପୋଲିସ ତଦନ୍ତ ଜାରି ରାଖିଛି । ମୃତ ବୃଦ୍ଧାଙ୍କ ପୁଅ ଓଡିଶା ବାହାରେ ରହି କାମ କରନ୍ତି । ସେ ଗତକାଲି ନିଜ ଘରକୁ ଆସିଥିଲେ । ତେବେ ସେ କାଲିଠାରୁ ନିଜ ଶଶୁର ଘରକୁ ଯାଇଥିବା ଜଣା ପଡିଛି । ସେହିପରି ବୃଦ୍ଧାଙ୍କ ଝିଅ ମଧ୍ୟ ବାହା ହୋଇ ନିଜ ଶଶୁର ଘରେ ରହୁଛନ୍ତି । ତେବେ ଘରେ ଏକାକି ଥିବାର ସୁଯୋଗ ନେଇ ବୃଦ୍ଧ ଦମ୍ପତିଙ୍କୁ ହତ୍ୟା କାରଯାଇଥିବାର ଜଣା ପଡିଛି ।
