ସୋର (ଏଟିଆର ବ୍ୟୁରୋ): ଗୋଟେ କି ଦୁଇଟି ନୁହେଁ ଏକକାଳୀନ ତିନି ତିନୋଟି ଦୁର୍ଘଟଣା । ତାହା ପୁଣି ଗୋଟିଏ ସ୍ଥାନରେ । ସିଧା କହିବାକୁ ଗଲେ ସିରିଜ୍ ଦୁର୍ଘଟଣା ଘଟିଛି । ଏଭଳି ଏକ ଅଭାବନୀୟ ଦୃଶ୍ୟ ବାଲେଶ୍ୱର ଜିଲ୍ଲା ସୋରରେ ଦେଖିବାକୁ ମିଳିଛି । ଏଥିରେ ଦୁଇ ଜଣ ଗୁରୁତର ଭାବେ ଆହତ ହୋଇଛନ୍ତି । ଆହତଙ୍କୁ ଚିକିତ୍ସା କରିବା ଲାଗି ଏସସିବି ମେଡିକାଲରେ ଭର୍ତ୍ତି କରାଯାଇଛି ।
ଗତକାଲି ବିଳମ୍ବିତ ରାତିରେ ସୋର ନିକଟବର୍ତ୍ତି ଛପୋଲିଆ ଠାରେ ଏକ କାର ଭାରସାମ୍ୟ ହରାଇ ଓଲଟି ପଡିଥିଲା । ଘଟଣାସ୍ଥଳରେ ପୋଲିସ ପହଁଚି କାର ଭିତରେ ଥିବା ଦୁଇ ଜଣ ବ୍ୟକ୍ତିଙ୍କୁ ଗୁରୁତର ଅବସ୍ଥାରେ ଉଦ୍ଧାର କରି ଆମ୍ବୁଲାନ୍ସ ଯୋଗେ ସେମାନଙ୍କୁ ମେଡିକାଲ ନେବାକୁ ପ୍ରସ୍ତୁତି କରୁଥିଲେ । ସେହି ସମୟରେ ଅଚାନକ୍ ଏକ ଟ୍ରକ୍ ଆସି ରାସ୍ତା କଡରେ ଥୁଆ ହୋଇଥିବା ପୋଲିସ୍ ଭ୍ୟାନକୁ ଧକ୍କା ଦେଇଥିଲା ।
ପୋଲିସ୍ ଭ୍ୟାନ୍ ରେ କେହି ନଥିବା ଫଳରେ ଏଥିରେ କୌଣସି ପୋଲିସ କର୍ମୀ ଆହତ ହୋଇନଥିଲେ ମଧ୍ୟ ଭ୍ୟାନ୍ ଟି ଚୂରମାର୍ ହୋଇଯାଇଛି । ସବୁଠୁ ବଡ କଥା ହେଉଛି ଟ୍ରକ୍ ଟି ପୋଲିସ ଭ୍ୟାନ୍ କୁ ଧକ୍କା ଦେଇ ଫେରାର ହୋଇଯାଇ ସୋର୍ ନିକଟରେ ଅନ୍ୟ ଏକ ଟ୍ରକ୍ କୁ ଧକ୍କା ଦେଇଛି । ଦୁର୍ଘଟଣାରେ ଟ୍ରକ୍ ଟି ମଧ୍ୟ ଭାଙ୍ଗିରୁଜି ଯାଇଛି ।
